Resei musylmandary dini basqarmasy Spýtnik V vaktsinasyn jasaýshylardan onyń quramy týraly aqparat aldy. Aldyn ala málimetter boiynsha, olarda musylmandar úshin tyiym salynǵan eshteńe joq, dedi Resei Federatsiiasy Musylmandar dini basqarmasynyń tóraǵasynyń orynbasary, múfti Ildar Aliaýtdinov. Bul týraly «RIA Novosti» agenttigi habarlady.
Buǵan deiin musylmandardy jańa vaktsina komponentteriniń halaldyqqa sáikestigi oilandyrǵan bolatyn. Ásirese olardy óndiris protsesinde shoshqa jelatinin qoldaný alańdatty. Buǵan deiin Tatarstan múftiiatynda habarlaǵandai, eger ol qandai da bir túrde qoldanylsa, onda vaktsina jaramsyz, al ony musylmandardyń paidalanýyn din mamandary sheshýi kerek.
«Ázirleýshilerden jaýap keldi. Shoshqa jelatini joq, adamnyń quramdas bólikteri (jasýsha jelisi) de joq. Biz Islam turǵysynan tyiym salynǵan nárse joq dep aita alamyz», – dedi Aliaýtdinov.
Onyń aitýynsha, ázirleýshilerge vaktsinanyń quramy týraly suraqtar qoiyldy jáne kelesi aptada vaktsinalardy ázirleýmen ainalysatyn ǵylymi institýttardyń ókilderi men din mamandarynyń birlesken otyrysy josparlanýda.
«Sonymen qatar biz dini-quqyqtyq qorytyndy – pátýá daiyndaimyz», – dep túsindirdi múfti.
