Astanada Ortalyq Aziiadaǵy sport ǵylymy men joǵary bilikti mamandar daiarlaý baǵytyndaǵy eń iri bilim berý jobalarynyń biri – Qazaq ulttyq sport ýniversitetiniń resmi ashylý rásimi ótti.
Saltanatty shara New Era of Sport: KNUS 2026 halyqaralyq forýmy aiasynda uiymdastyrylyp, oǵan memlekettik organdardyń ókilderi, halyqaralyq sport federatsiialarynyń basshylary, olimpiadalyq qozǵalys músheleri jáne akademiialyq qaýymdastyq ókilderi qatysty.
Is-sharaǵa Qazaqstan Respýblikasy Týrizm jáne sport vitse-ministri Serik Jarasbaev, Birikken kúres álemi uiymynyń (UWW) prezidenti Nenad Lalovich, Halyqaralyq kibersport federatsiiasynyń (IESF) prezidenti Vlad Marineský, Dúniejúzilik dopingke qarsy agenttiktiń (WADA) ókili Rafal Pehota, sondai-aq halyqaralyq uiymdardyń basshylary, sheteldik joǵary oqý oryndarynyń ókilderi, ulttyq sport federatsiialarynyń jetekshileri, ǵalymdar men sarapshylar qatysty.
Ýniversitetti sońǵy bes jyl boiy júieli túrde jańǵyrtý jumystarynyń alǵashqy kezeńiniń aiaqtalǵanyn bildiretin mańyzdy oqiǵa – jańa kampýstyń ashylýy boldy. Osy ýaqyt ishinde oqý orny halyqaralyq áriptestigin keńeitip, ǵylymi áleýetin nyǵaityp, joǵary jetistikter sporty, buqaralyq sport jáne sport indýstriiasy úshin mamandar daiarlaityn zamanaýi bilim berý ekojúiesin qalyptastyrdy.
Qazaq ulttyq sport ýniversitetiniń quryltaishysy Nurasyl Medeý jańa ýniversitettiń ashylýy Qazaqstanda sport salasyna arnalǵan zamanaýi bilim berý jáne ǵylymi platformany qalyptastyrý jolyndaǵy bes jyldyq júieli jumystyń nátijesi ekenin atap ótti. Onyń aitýynsha, ýniversitet ýaqyt talabyna jaýap beretin bilim ordasy retinde qurylyp, búginde halyqaralyq deńgeide el namysyn qorǵai alatyn jattyqtyrýshylardy, ǵalymdardy, sport dárigerlerin, pedagogter men sport menedjerlerin daiarlaityn mańyzdy ortalyqqa ainalyp keledi.
«Bes jyldyń ishinde ýniversitet bilimge umtylys, talant pen eńbek toǵysqan úlken ortalyqqa ainaldy. Búgin biz berik irgetas qalaǵanymyzdy maqtanyshpen aita alamyz. Aldymyzda budan da aýqymdy jetistikter, halyqaralyq moiyndalý, ǵylym men sporttaǵy jańa jeńister kútip turǵanyna senimdimin. Qazaq ulttyq sport ýniversiteti ozyq bilim men innovatsiianyń, bolashaq chempiondar men el kóshbasshylaryn tárbieleitin mańyzdy ortalyqqa ainalady», – dedi ýniversitettiń quryltaishysy Nurasyl Medeý.
Shara barysynda Birikken kúres álemi uiymynyń (UWW) prezidenti Nenad Lalovich Qazaqstannyń álemdik kúres sportynyń damýyna qosyp otyrǵan úlesin joǵary baǵalap, halyqaralyq talaptarǵa sai sportshylardy, jattyqtyrýshylardy jáne sport menedjerlerin daiarlaityn zamanaýi bilim berý bazasynyń mańyzdylyǵyna toqtaldy.
Óz kezeginde Halyqaralyq kibersport federatsiiasynyń (IESF) prezidenti Vlad Marineský ulttyq sport ýniversitetiniń ashylýy dástúrli sporttyń, tsifrlyq tehnologiialardyń jáne innovatsiialyq bilim berýdiń toǵysýyna negizdelgen jahandyq úrdistiń aiqyn kórinisi ekenin aitty. Onyń sózinshe, búgingi tańda kibersporttyń damýy myqty ǵylymi jáne akademiialyq negizsiz múmkin emes, al Qazaq ulttyq sport ýniversitetimen áriptestik bolashaq mamandardy daiarlaýda jańa múmkindikterge jol ashady.
Saltanatty rásim aiasynda Birikken kúres álemi uiymynyń (UWW) prezidenti Nenad Lalovichke jáne Halyqaralyq kibersport federatsiiasynyń (IESF) prezidenti Vlad Marineskýǵa «Qazaq ulttyq sport ýniversitetiniń Qurmetti professory» ataǵy tabystaldy. Sonymen qatar stýdentterdiń akademiialyq adaldyqty, ádil básekelestikti, ózara qurmet pen sporttyq etikany ustanýǵa degen umtylysyn bildiretin Stýdentter hartiiasyna qol qoiý rásimi ótti.
Forým qonaqtaryna ýniversitettiń innovatsiialyq ǵylymi zerthanalary, ǵylymi-zertteý ortalyqtary men bilim berý habtary tanystyryldy. Delegatsiialar tsifrlyq infraqurylymmen, zamanaýi sport nysandarymen, ǵylymi jabdyqtarmen jáne sportshylardy daiarlaýǵa, ǵylymi zertteýler júrgizýge ári halyqaralyq bilim berý baǵdarlamalaryn júzege asyrýǵa arnalǵan keńistiktermen tanysty.
Búginde Qazaq ulttyq sport ýniversiteti tek bilim berý mekemesi ǵana emes, sonymen qatar jańa býyn mamandaryn daiarlaityn, sport ǵylymyn damytatyn, innovatsiialardy engizetin jáne álemniń jetekshi sport uiymdarymen halyqaralyq yntymaqtastyqty nyǵaitatyn halyqaralyq ortalyq retinde qalyptasyp keledi. Bul baǵyt Qazaqstannyń jahandyq sport keńistigindegi bedelin arttyryp, halyqaralyq úzdik tájiribelerge negizdelgen zamanaýi sporttyq bilim berý júiesin damytýǵa múmkindik beredi.
