Kollaj: Caravan.kz
Kúni keshe dziýdoshy Eldos Smetov pen Ǵusman Qyrǵyzbaevtardyń Olimpiadadaǵy jeńisi kúlli qazaq halqyn qýanyshqa bóledi. Týymyz kókte jelbirep, ánuranymyz Parij tórinde shyrqaldy. Alaida, jeńis bar jerde jeńilis te bar. Boksshy Aslanbek Shymbergenov alǵashqy kezdesýinde qarsylasyna ese jiberdi. Bul sátsizdigine jýrnalisterge bergen suhbatynda "Allahtyń qalaýy solai boldy" degen ýáj aitty. Mundai aqtalý Jeli qoldanýshylary arasynda sport salasyndaǵy burynnan ózekti másele - dini radikalizm taqyrybyn kóterýge sebep boldy.
Máselen, bloger Erbol Janatuly tanymal sportshylardy "qaba saqal, qyrma murt" qaýym qushaǵyna basyp alǵany eshkimdi alańdatpai jatqanyn jazdy. Memlekettiń, salyq tóleýshilerdiń qarjysymen bala kezden baptalyp, biikke jetken sportshy - halyq ókili, halyq perzenti. Ondai daiyn "ónimdi" Bekbolat, Muhametjandar óz "dininiń" piaryna paidalanyp jatqanyna mán bermeimiz, deidi ol.
"Eldos keshe "Olimpiada chempiony bolý taǵdyryma jazylǵan eken" dedi. Úndemedik. Sebebi ol - chempion. Al bizdiń sanamyz ataqty men biligi bar adamdy synai almaidy.
Aslanbek jeńilip qalǵanda "Allahtyń qalaýy solai boldy" dedi. Synadyq. Sebebi bizdiń sanamyz álsiz ben jeńilgenderdi taptap ótip, ústine jýyndy quiyp ketýge beiim. Bul — jas sportshylarǵa jasyryn messedj. "Bizdiń dindegiler ǵana osyndai jetistikke jetedi" degen ym. "Myqtylardyń bári bizdiń qatarymyzda!" degen ishara", - dep jazdy bloger.
Onyń aitýynsha sportshyda kóbine mundailardyń ara-jigin ajyrata alatyn sana bolmaidy. Sportshy - kóp shynyqqan dene, tásilderdi kóp qaitalap, baptalǵan tán iesi. Onyń 24 saǵatynyń kóp bóligi fizikalyq daiyndyqqa jumsalǵan.
"Sportshy - dini ideologiialardan qorǵaýǵa muqtaj adam! "Jat dini ideologiiadan bárimizdi qorǵaýshy - memleket! Jaǵdai osyndai", - degen oida bloger.
Jýrnalist Arman Áýbákir de osy pikirdi qostady. Ol da sport salasyn jat dini ideologiia jaýlap alǵan degendi aitady.
"Sportshylardyń tarih pen mádenietti, saiasatty bilýi óte sirek kezdesetin qubylys. Sondyqtan, olardyń qurýly turǵan tuzaqqa túsýi op-ońai. Eldos altyn alǵan kúni "bizdiń jamaǵattyń ókili jeńiske jetti" dep maqtanǵandai onyń sájde jasap jatqan sýretin jarysa taratqandar kimder? Sájdege basyn tigizgen adam osyndai jetistikke jetedi degendei ishara, astyrtyn ideologiialyq nasihat qatty júrdi. Eger másele dinde bolsa, ótken jolǵy olimpiadada nege bir altyn almadyq? "Allahtyń qalaýymen" dep barlyǵy saqal sipap qur qaitqan joq pa?", - dep jazdy Arman Áýbákir.
Ol Eldostyń jeńisi Allahtyń emes, eńbektiń arqasy degendi nasihattaýymyz kerek deidi.
"Ras, Eldos tabandy jigit. Qajyrly eńbegimen asý bermes belesti baǵyndyrdy. Óz-ózin dáleldedi. Allahtyń emes, eńbektiń arqasy. Daiyndalmasa, úzdiksiz jattyqpasa, Allah oǵan dym da bermes edi. Din jolynda bolsa da, bolmasa da árbir qazaqtyń jetistigine qýanamyz. Óitkeni biz eń birinshi qazaqpyz. Al endi ony jalpy qazaqtan bólektep, jamaǵattyń ókili retinde ideologiialyq nasihat quralyna ainaldyrý - asa qaýipti úrdis. Onsyz da din shyrmaýyna túsken sport salasyn odan saiyn qara tunekke batyrý desek te bolady.
Bárimiz bir qazaqpyz. Árýaq dep babalarymyz jaýǵa shapqan. Tegimizdi, tamyrymyzdy umytpaiyq. Sportshylarǵa tarih pen ulttyq mádenietti oqytý kerek-aý", - dep pikir bildirdi jýrnalist.
