Qaraǵandy oblysynyń Balqash qalasynda Qańtar oqiǵasy kezinde zańsyz ainalymǵa ketken qarý-jaraqtyń jasyrylǵan orny anyqtaldy. Qarý iesiz qalǵan qus fabrikasynyń aýmaǵynda jasyrylǵan, dep habarlaidy ult.kz.
Qaraǵandy jáne Ulytaý oblystary boiynsha Qylmystyq-atqarý júiesi departamentiniń №31 mekemesinde jazasyn ótep jatqan sottalǵandardyń biri quqyq qorǵaý organdaryna yqtimal jasyryn oryn týraly aqparat bergen.
Alynǵan málimetti jedel ýákilder tekserip, izdestirý jumystaryna Ulttyq qaýipsizdik komitetiniń qyzmetkerleri de jumyldyryldy. Arnaiy operatsiia prokýratýranyń qadaǵalaýymen júrgizilgen.
Vedomstvonyń málimetinshe, 27 maýsym kúni Balqash qalasyndaǵy Taranǵalyq kentine kireberiste ornalasqan iesiz qalǵan qus fabrikasynyń aýmaǵyn tekserý kezinde muqiiat jasyrylǵan oryn tabylǵan. Onyń ishinen 2022 jylǵy Qańtar oqiǵasy kezinde urlanǵan qarýlar tiziminde bolǵan tórt atys qarýy shyqqan.
Quqyq qorǵaý organdary Qańtar oqiǵasynan keiin zańsyz ainalymǵa ketken qarý-jaraqty izdeý jumystaryn jalǵastyryp jatyr. Tabylǵan qarýlar qylmystyq maqsatta qoldanylýynyń aldyn alý úshin tárkilenedi.
Eske salaiyq, buǵan deiin Almatydaǵy Sairan kóliniń jaǵasynan da Qańtar oqiǵasy kezinde urlanǵan qarý-jaraq tabylǵan bolatyn. Ishki ister ministrliginiń málimetinshe, jyl basynan beri elimizde 900-den astam qarý tárkilengen. Onyń 74-i 2022 jylǵy Qańtar oqiǵasy kezinde urlanǵan qarýlar sanatyna jatady. Sonymen qatar, tórt myńnan astam oq-dári tárkilengen.
