Astananyń qylmystyq ister jónindegi mamandandyrylǵan aýdanaralyq sotynda "Qazaqstan injiniring" basqarma tóraǵasynyń burynǵy orynbasary Qanat Sultanbekovtiń dáleldengen para mólsheri - 1 069 917 155 teńge degen sheshimge keldi, - dep habarlaidy Tengrinews.kz tilshisi.
"Osylaisha, joǵaryda aitylǵan barlyq epizodty eskere otyryp, Sultanbekovtiń dáleldengen para mólsheri - 1 069 917 155 teńge", - delingen sot úkiminde.
Qanat Sultanbekovke qatysty sot qylmystyq jaýapkershilikke tartý jáne jaza qoldanýda myna jaǵdailardy eskerdi: ol óz kinásin moiyndady jáne istegeni úshin ókinish bildirdi, qylmystyq zańbuzýshylyq tergeý sharalaryna belsendi kómek kórsetý, qylmystyq istiń basqa da múshelerin jaýapkershilikke tartýǵa kómektesý, buryndary tergeýshiler bilmegen qylmystyq zańbuzýshylyqtardy ashyp kórsetý, kámelet jasyna tolmaǵan balalalarynyń bolýy (2002, 2004 jáne 2008), buryndary sotty bolmaǵany, qyzmet etken jerinen jaqsy pikir bolýy, memleket aldynda kórsetken qyzmeti úshin (memlekettik nagrada - "Qurmet" ordeni), keltirilgen zalaldyń ornyn toltyrý (10 000 000 teńge jáne 300 000 dollar qaitardy).
Eske salaiyq, 2017 jyly 29 qarashada Astananyń qylmystyq ister jónindegi mamandandyrylǵan aýdanaralyq sotynda "Qazaqstan injiniring" basqarma tóraǵasynyń burynǵy orynbasary Qanat Sultanbekovke qatysty sot úkimi shyqty.
Sot Sultanbekovti aiypty dep tanyp, 10 jylǵa bas bostandyǵynan aiyrdy. Ol jazasyn barynsha qaýipsizdendirilgen mekemede óteidi.
Qanat Sultanbekov para aldy degen aiyppen biylǵy qańtarda sot aldyna kelgen edi. Onymen qatar, taǵy segiz adam sot aldyna kelgen bolatyn: Málik Syzdyqov, Muhtar Qarabekov, Aibek Bekturǵanov, Arsen Tólemisov, Qanat Baiqadamov, Gil Smolinski, Mberekrehim Gabdýl-Kabirov jáne Gimran Bisenov.
