Eldegi sot saraptamalyq nysandardyń materialdyq-tehnikalyq bazasyn nyǵaitý úshin 31 mlrd teńge qajet. Ádilet ministrliginiń keńeitilgen alqa májilisinde osyndai problema kóterildi, dep habarlaidy QazAqparat.
Ministr Qanat Mýsin jiynǵa qatysýshylardan sot saraptamalyq qyzmettiń sapasyn kóterýge ne kedergi bolyp otyrǵanyn surady.
Mamandardyń aitýynsha, negizgi problema materialdyq-tehnikalyq bazaǵa tirelip tur.
«Qazirgi tańda Nur-Sultan qalasynda sot saraptama ortalyǵynyń qurylysy aiaqtaldy. Bul keiingi 10 jyldaǵy eń iri joba deýge bolady. Qazaqstan boiynsha dál osyndai sot saraptamasynyń ǵimaraty bolyp kórgen joq. Kelesi jyly, odan keiingi jyldary da Parlament pen Qarjy ministrligi bizdiń osy astanadaǵy siiaqty ǵimarttardy basqa qalalarda salý týraly usynystarymyzdy qoldaidy dep úmittenemiz.
Sondai-aq kúrdeli sot saraptamalaryn ótkizýge qajetti jańa, zamanaýi qondyrǵylar satyp alsaq degen oiymyz bar. Mysaly, daktiloskopiialyq-genomdyq saraptama júrgizýge, molekýliarlyq-genetikalyq zerthana jumystaryn júrgizýge arnalǵan qurylǵylar kerek», - dedi vitse-ministri Azamat Ámirǵaliev.
Onyń aitýynsha, álemde sot sarapatamasynyń tásilderi jyldam damyp jatyr. Sol úshin jyl saiyn qondyrǵylar men quraldardy jańalap otyrýǵa biýdjetten 1,5 mlrd teńge surap júr.
Sot saraptamalar ortalyǵy direktorynyń mindetin atqarýshy Rahmetolla Nuǵmanovtyń aitýynsha, saraptama óndirisinde qoldanylatyn quraldardyń basym bóligi tozǵan. Eń jańa degenderiniń ózine 5 jyl buryn alynǵan.
«Jalpy materialdyq-tehnikalyq baza boiynsha qajetti quraldarǵa 31 mlrd teńge kerek bolyp tur. Balansymyzda 19,2 mlrd teńgeniń múligi bar. Sonyń ishinde 9 mlrd teńgeniń múligi óndiriske tikelei qatysty. Bul 9 mlrd teńgelik bazanyń 68 paiyzy tozǵan. Tek 32 paiyzy qaldy. Sonda 6,5-7 mlrd teńge qazirdiń ózinde qajet degen sóz. Sońǵy alǵan qondyrǵymyzdyń ózi 2016 jyly shyqqan. Onyń aldyndaǵylary tipti 2007 jyldary alynǵan», - dedi maman.
