Foto: ashyq derekkóz
Pavlodar oblysynyń turǵyny satyp alǵan «CHERY TIGGO 8 PRO MAX» markaly avtokóligi sapasyz bolyp tanylyp, sot sheshimimen satyp alý-satý sharty buzyldy, dep habarlaidy Ult.kz.
Is materialdaryna sáikes, azamat 2023 jyldyń aqpan aiynda atalǵan kólikti JShS-ten 19,6 million teńgege satyp alǵan. Kólikke 84 ai nemese 200 myń shaqyrym júriske kepildik berilgen. Sondai-aq avtokólik bank kepildiginde bolyp, saqtandyrylǵan.
2025 jyldyń naýryz aiynda, iaǵni kepildik merzimi ishinde, avtokóliktiń qozǵaltqyshy isten shyqqan. Kólik satýshy kompaniianyń qyzmet kórsetý ortalyǵyna tapsyrylǵanymen, uzaq ýaqyt boiy jaramsyz kúide turǵan. Iesi JShS-ke birneshe ret júgingenimen, jóndeý jumystary tolyq aiaqtalmaǵan.
Osyǵan bailanysty avtokólik iesi sotqa talap aryz berip, satyp alý-satý shartyn buzýdy, kólik qunyn, ósimpuldy, keltirilgen zalaldy jáne moraldyq ziiandy óndirýdi suraǵan.
JShS ókili talapty moiyndamai, aqaý kepildik jaǵdaiyna jatatynyn, tiisti jóndeý sharalary qabyldanǵanyn jáne ýaqytsha basqa avtokólik berilgenin alǵa tartqan.
Alaida Pavlodar qalasynyń azamattyq ister jónindegi aýdanaralyq soty isti qaraý barysynda aqaýdyń kepildik merzim ishinde paida bolǵanyn, al tutynýshynyń paidalaný erejelerin buzǵanyn rastaityn dálelder jaýapker tarapynan usynylmaǵanyn atap ótti. Sonymen qatar kóliktiń uzaq ýaqyt boiy jaramsyz kúide bolýy taýardyń eleýli kemshiligi bar ekenin kórsetetini aityldy.
Sot Azamattyq kodeks pen «Tutynýshylardyń quqyqtaryn qorǵaý týraly» zań normalaryn basshylyqqa alyp, talap qoiýshynyń ýájderin negizdi dep tanydy. Nátijesinde satyp alý-satý sharty buzylyp, JShS-ten avtokólik quny retinde 19,6 million teńge jáne moraldyq ziian úshin 150 myń teńge óndirildi.
Pavlodar oblystyq soty JShS men bank bergen apelliatsiialyq shaǵymdardy olardyń keri qaitarylýyna bailanysty qaraýsyz qaldyrdy.
Sot aktisi zańdy kúshine endi.
