Qaraǵandy qalasynyń Qazybek bi aýdandyq soty burynǵy energetika vitse-ministri Anatolii Shkarýpany aqtap shyqty. Oǵan biýdjet qarajatyn jymqyrǵany úshin aiyp taǵylǵan bolatyn. Búgin Sýdia Janat Egemberdieva jańa úkimdi oqydy, dep habarlaidy "Ult aqparat".
Eks energetika vitse-ministri Anatolii Shkarýpa men «TKSh damytý qory» kompaniiasynyń burynǵy basqarma tóraǵasy Qaisar Baidaly men «ENERSO» kompaniiasynyń direktory Erlan Nábievke qatysty úkimniń jariialanýy úsh saǵattan astam ýaqytqa sozyldy. Qaraǵandy qalasy Qazybek bi aýdandyq sotynyń sýdiasy Janat Egemberdieva 115 tomdy quraityn is materialdaryn oqyp berdi.
Qylmystyq is materialdaryn zerdelep, sottalýshylardan, jábirlenýshilerdiń ókilderinen, aiyptaý kýágerlerinen, sondai-aq qorǵaýshylardan, sarapshylardan, mamandardan jaýap alyp, sot sottalýshylardyń áreketterinde qylmystyq quqyq buzýshylyq quramy joq degen qorytyndyǵa keldi.
«Sotqa deiingi tergep-tekserý organy aiyptaý aktisinde qylmystyq áreket jasaý tásilin, atap aitqanda: urlaý qalai jasalǵanyn – iemdenip alý nemese jymqyrý arqyly ekenin kórsetpedi. Is boiynsha júrgizilgen, is boiynsha keltirilgen zalal somasyn boljamdy rastaityn saraptamalardy sot olardy júrgizý tártibiniń eleýli buzylýyna, saraptamalardyń, sarapshylardyń, sondai-aq mamandardyń qorytyndysyna bailanysty jol berilmeitin dáleldeme dep tanydy. Olar shyndyqqa janaspady jáne olar keltirilgen shyǵyn mólsherin rastamady. Aiyptalýshylar arasyndaǵy qylmystyq qastandyq faktisi sot tergeýimen rastalǵan joq. Sot talqylaýy barysynda sottalýshylardyń kináliligi týraly jetkilikti jáne bultartpas dálelder alynǵan joq. Is boiynsha júrgizilgen tergeý áreketterinde kináliliktiń dáleli joq. Jaýap alynǵan kýágerler sottalýshylardyń kinásin tikelei nemese janama túrde rastamady», - dep túsindirdi Qaraǵandy qalasy Qazybek bi aýdandyq sotynyń sýdiasy Janat Egemberdieva.
Sondai-aq, sýdia sot tergeýinde zalal somasy anyqtalmaǵanyn atap ótti. Bul qylmys quramynyń joqtyǵyn kórsetedi.
Aqtalǵandar tergeý organdaryna talap aryz berip, zańsyz qylmystyq jaýapkershilikke tartylǵany úshin moraldyq ziiannyń ótelýin talap etýge quqyly.
Janat Egemberdieva osy qylmystyq isti tergeý kezinde QIJK normalarynyń buzylýyna jol bergeni úshin Bas prokýratýraǵa qaýly shyǵardy.
Esterińizge sala keteiik, Energetika vitse-ministri Anatolii Shkarýpa 2018 jyldyń 18 qarashasynda qamaýǵa alyndy. Oǵan jáne taǵy eki kúdiktige «Turǵyn úi-kommýnaldyq sharýashylyqty damytý qory» AQ Qaraǵandy oblysynyń Saran qalasynda jylý esepteý quraldaryn satyp alýǵa jáne ornatýǵa bólgen 104 mln teńgeni qarajatyn jymqyrdy dep aiyp taǵylǵan bolatyn.
Buǵan deiin prokýror ony 10 jylǵa bas bostandyǵynan aiyryp, ómir boiy memlekettik qyzmetpen ainalysýǵa tyiym salýdy suraǵan. Shkarýpa men advokaty aiyptyń "oidan qurastyrylǵanyn" aityp, aqtaýdy suraǵan. Seisenbi kúni sot úkimi oqylǵannan keiin sýdia ony bosatty. Eki jyl boiy tergeýde bolǵan Shkarýpa basynda – tergeý izoliatorynda, keiinirek úiqamaqta bolǵan.
Sot bul is boiynsha aiyptalǵan "Turǵyn úi-kommýnaldyq sharýashylyǵyn damytý qory" basqarmasynyń burynǵy tóraǵasy Qaisar Baidaly jáne ENERCO kompaniiasynyń direktory Erlan Nábievti de aqtady. Olarǵa prokýratýra 8 jyl túrme jazasyn suraǵan edi.
Sot "Turǵyn úi-kommýnaldyq sharýashylyǵyn damytý qory" basqarmasynyń aiyptalýshylardan 380 million teńge óndirip alý týraly azamattyq shaǵymyn da qanaǵattandyrmady.
25 qańtarda jaryssózden keiin úsh aiyptalýshy "qylmys quramynyń joqtyǵyn jáne aqsha jymqyrý faktisi dáleldenbegenin" alǵa tartyp, ózderin aqtaýdy suraǵan. Olardyń sózine qaraǵanda, jylý qazandyǵynyń qurylysy ózderine qatysy joq sebepterge bailanysty aiaqtalmaǵan.
