Soltústik óńirlerde shańǵy sportyn damytý tiisti deńgeide emes. Bul týraly Beijińdegi Olimpiada oiyndarynyń qorytyndysy boiynsha baspasóz máslihatynda Ulttyq Olimpiada komiteti sport direktsiiasynyń direktory Elsiiar Qanaǵatov aitty, dep habarlaidy QazAqparat.
«Ózderińiz bilesizder, 34 sportshy 87 joldamamen osy Olimpiadaǵa bardy. Árine, jankúierler bizden medal kútti. Beijiń Olimpiadasynda 29 memleket tiisti nátijege qol jetkizip, medal aldy. Biz egemendik alǵannan beri qysqy Olimpiadalarǵa qatysqanda 8 ǵana medalǵa ie bolyppyz. Onyń tórteýin bir sportshy alyp berdi. Osy joly alǵa basatyndai jaǵdai boldy. Fristail-mogýldan Iýliia Galysheva qatysty jáne short-trekten de úmitimiz jaqsy boldy. Alaida medalǵa ie bola almady», - dedi Qanaǵatov Ortalyq kommýnikatsiialar qyzmetinde
Onyń aitýynsha, elimiz sportshylary arasynda short-trekten birshama ilgerileý bolǵany baiqaldy.
«Saiysta Abzal Ájiǵalievtiń nátijesin kórdińizder. Abzal óziniń sózinde de short-trekti áli de damytý kerek ekenin aitty, biz de bul ýájin qoldaimyz. Konki sport túrinen de bizde alǵa jyljý bar dep aitýǵa bolady», - dedi UOK sport direktsiiasynyń direktory.
Sonymen qatar ol eń nashar nátije kórsetken sport túri shańǵy jarysyna qatysty ekenin aitty.
«Sońǵy jyldary shańǵy sportynyń nátijesi tómendep ketti. Bul baǵytta buqaralyq sportty damytý nashar bolyp tur. Soltústik óńirlerde shańǵy sportyn damytý tiisti deńgeide emes. Sondyqtan osy Olimpiadanyń qorytyndysy boiynsha shańǵy, biatlonnyń nashar nátijesine, jalpy Beijińdegi nátijemizge durystap saraptama jasap, durys jaýaptarmen alǵa jyljý kerek. Atap aitqanda, buqaralyq sportty damytýǵa kóńil bólgen jón. Aýyldy jerlerge de sport keshenderin salý ózekti», - dedi Qanaǵatov.
