Foto: Májilis
Búgin Parlament májilisiniń jalpy otyrysynda depýtat Nartai Sársenǵaliev áskerdegi sarbazdardyń túrli dene jaraqatyn alyp, tipti keibireýi qaitys bolyp jatqany týraly másele kóterdi, dep habarlaidy "Ult Aqparat".
Depýtattyń aitýynsha, áskerdegi qylmystyń saldarynan kóptegen ata-analar óz balalaryn áskeri boryshyn óteýge jiberýge qulyqsyz.
"Máselen, sońǵy úsh jylda Qazaqstanda 270 áskeri qyzmetker qaitys bolǵan, al sońǵy tórt jylda áskerde 86 sýitsid tirkelgen, 20 áskeri adam óz-ózine qol salýǵa oqtalǵan. Bul – áskeri prokýratýra málimdegen resmi san. 2023 jylǵy tamyzda áskeri bólimshelerdiń birinde komandir áskerge jańadan kelgen sarbazdy oryndyqpen uryp, soqqyǵa jyqqan. 2024 jyldyń maýsym aiynda Jambyl oblysynyń bir áskeri bólimshesinde áskerge kelgenine bir-aq ai bolǵan sarbaz es-tússiz jansaqtaý bólimine túsken", - deidi Nartai Sársenǵaliev.
Sonymen qatar depýtat áskerde júrip, basynan jaraqat alyp, 5 ai boiy es-tússiz jatqan Ulttyq ulannyń jaýyngeri Erbaian Muhtardyń jáne Aqtaý gornizonynda qaitys bolǵan Marat Barqulovtyń jaǵdaiyn sóz etti.
"Jaýaptylar jaýapkershilikten jaltaryp, «Erbaian dárethanaǵa qulap, jaraqattandy» deidi. Buǵan kim senedi? Jaraqattyń saldarynan sarbazdyń basynyń jartysyn alyp tastaýǵa týra kelgen. Endi oǵan turaqty kútim qajet. 7 qyrkúiek kúni Aqtaýdaǵy gornizonda sarbaz Marat Barqulov esimdi baýyrymyz kóz jumdy. Ony ofitser atyp tastaǵan. Bul qasaqana jasalǵan áreket pe, joq pa? Atalǵan suraqtyń jaýabyn tergeý oryndary ádil zerttep, nátijesin qoǵamǵa ashyq túrde jetkizýi kerek", - deidi ol.
Májilismen "áskeri bólimderde 50 myńnan astam beinekamera bar" dep málimdegen Qorǵanys ministrliginiń sózin eske alyp, ondaǵy jazbalar qaida ekenin surady.
"Álde Erbaian sekildi baýyrlarymyz jaraqat alǵanda álgi kameralar teris qarap qaldy ma?" - dedi N. Sársenǵaliev.
Áskerdegi álimjettik máselesin AMANAT partiiasy 2022 jyly kótergen, alaida jaǵdai túzelmek túgili, ýshyǵyp, sarbazdardyń áskerde jaraqat alyp, qaitys bolýy jalǵasyp jatyr deidi depýtat.
"Osy tusta taǵy bir túitkil bar, áskeri qyzmetkerlerdiń áleýmettik jaǵdaiy tómen. Olardyń ailyǵy shailyǵyna jetpeitini, áleýmettik jaǵdailarynyń tómen ekeni ámbege aian. Bul jaǵdaidy túzetý de kezek kúttirmeitin másele", - dep otyr depýtat Sársenǵaliev.
Májilis depýtaty Qazaqstan Respýblikasynyń Qorǵanys ministri Rýslan Jaqsylyqovqa joldaǵan saýalynda kelesi sharalardy qolǵa alýdy usyndy:
1. Elimizdiń armiiasyndaǵy atalǵan keleńsizdikti tyiý jáne onyń aldyn alý boiynsha naqty sharalar qabyldaý.
2. Áskerilerdiń áleýmettik jaǵdaiyn jaqsartýǵa baǵyttalǵan
is-áreketterdi kúsheitý.
