Sońǵy 3 jylda Sybailas jemqorlyqqa qarsy qyzmet para berý faktisi boiynsha 1054 qylmysty tirkedi. Bul týraly AntikorNEWS alańynda Sybailas jemqorlyqqa qarsy is-qimyl agenttiginiń asa mańyzdy ister jónindegi tergeýshisi Daniiar Bekaidarov aitty, dep habarlaidy QazAqparat.
«Sońǵy 3 jyldaǵy dinamika para berýshilerge qatysty qylmystardy tirkeý faktileriniń óskenin kórsetip otyr. Máselen, 2018 jyly 232 qylmys tirkelgen bolsa, 2020 jyly osyndai 480 fakti, iaǵni eki ese kóp tirkelgen. Para berýshilerdi anyqtaýdyń artýy adal memlekettik qyzmetshilerdiń olarǵa para berý faktileri týraly jii habarlaýyn kórsetýi múmkin», - deidi QR Sybailas jemqorlyqqa qarsy is-qimyl agenttiginiń asa mańyzdy ister jónindegi tergeýshisi Daniiar Bekaidarov.
Sondai-aq, ol sońǵy úsh jylda para bergeni úshin 641 adam sottalǵanyn aitty (2018 jyly – 198, 2019 jyly – 187, 2020 jyly – 256).
«Onyń ishinde 151 adamǵa bas bostandyǵynan aiyrý jazasy taǵaiyndalsa (2018 jyly – 52, 2019 jyly – 37, 2020 jyly – 62), 413 adam aiyppul tóledi (2018 jyly – 109, 2019 jyly – 128, 2020 jyly – 176), al 62 adamǵa qatysty bas bostandyǵyn shekteý sharasy qoldanyldy (2018 jyly – 30, 2019 jyly – 16, 2020 jyly – 16). 15 adamǵa shartty túrde sottaý, keiinge qaldyrý jáne taǵy da basqa jaza taǵaiyndaldy», - deidi ol.
