Bul týraly Ortalyq kommýnikatsiialar qyzmetinde ótken tótenshe jaǵdai kezindegi kiristi joǵaltqan azamattarǵa áleýmettik tólemderden áleýmettik járdemaqy taǵaiyndaý boiynsha onlain brifingte aityldy, dep habarlaidy "Ult aqparat".
«Memlekettik saqtandyrý qorynan tólenetin 42 500 teńge – resmi jáne beiresmi jumys istep júrgen, biraq tótenshe jaǵdaiǵa bailanysty tabysynan aiyrylǵan adamdar úshin qarastyrylǵan tólem. Bul – kómektiń bir túri ǵana. Zeinetaqy, járdemaqy ýaqytyly tólenýde. Ai saiyn 300 mlrd teńgege deiin tólenýde. Ol indeksteledi. Kásipker azamattarǵa úkimet tarapynan salyq, nesie, kommýnaldyq shyǵyndardy tóleý merzimin keiinge shegerýge qatysty kóptegen jeńildikter qarastyrylyp jatyr. Az qamtylǵan, kópbalaly otbasylar, múgedek jandar jasyna, sanatyna qaramastan, múgedek balany tárbielep otyrǵan ata-analar, resmi jumyssyz retinde tirkelgen adamdarǵa biýdjettiń esebinen, «Biz birgemiz» qorynyń esebinen jáne elimizdegi patriot azamattardyń atynan azyq-túlik toptamalary jáne aqshalai kómek kórsetilip jatyr. Jumyssyz qalǵan azamattarǵa osy saqtandyrý qorynan bólek jumysynan aiyrylǵan jaǵdaidaǵy tólem bar», - deidi QR Eńbek jáne halyqty áleýmettik qorǵaý ministri Birjan Nurymbetov.
Ol memlekettik saqtandyrý qorynan tólenetin tólemge ótinish qabyldaityn egov.kz jáne 42500.enbek.kz portaly jumys istep jatqanyn aitty.
«Sońǵy úsh kúnde 42500.enbek.kz portalyna 1 284 000 ótinish kelip tústi. Qazirgi ýaqytta elektrondyq qoltańba qoldaný qajettigi joq. Ony SMS arqyly keletin parolmen rastaýǵa bolady. Telegram-bot búgin iske qosyldy. Onyń qosylýy keshikken sebebi – alaiaq adamdar feik telegram-bottardy jariialap, halyqty jańylystyrdy», - deidi ol.
