Ótken demalys kúnderi elimizdiń sý aidyndarynda 8 adam sýǵa batyp ketti. Bul týraly Tótenshe jaǵdailar komitetinen málim etti, dep habarlaidy "Ult aqparat".
«Ótken demalys kúnderi elimizdiń sý aidyndarynda 8 adam batyp ketti. Onyń ishinde 6 qaiǵyly oqiǵa sýǵa túsýge ruqsat etilmegen jerde oryn alǵan» dep atap ótedi vedomstvodan.
Atap aitqanda, 6 maýsym kúni Qostanai oblysynyń Sarykól aýdanyna qarasty Timiriazev aýyl okrýginde jasandy sý qoimasyna 1972 jyly dúniege kelgen áiel batyp ketti. Al kelesi kúni osy oblysqa qarasty Mediqara aýdanynda, Lesnoe aýylynan 12 shaqyrym jerde Qarǵaly ózenine shomylǵan 1976 jyly dúniege kelgen azamat sýǵa batyp ajal qushty.
6 maýsymda Aqmola oblysynyń Zerendi aýdanyna qarasty Qyzyl Kordon aýylynyń tusyndaǵy jasandy sý qoimasyna 1988 jyly dúniege kelgen jigit batyp mert boldy.
2003 jyly dúniege kelgen Ózbekstan azamatynyń da ajaly sýdan keldi. Ol 6 maýsym kúni Qapshaǵai sý qoimasynda, «Rio» demalys orny aýmaǵynda sýǵa batqan. Osy oblystyń Ile aýdanynda Kaztsink aýylynan 10 shaqyrym jerdegi Lokator ózenine 2001 jyly dúnie kelgen jas jigit batyp ketti.
6 maýsym kúni Oral qalasynda, shaǵan ózeninde shomylyp júrgen 1979 jyly dúniege kelgen áieldi matorly qaiyq qaǵyp, sonyń saldaryna ol sýǵa batyp qaza tapty.
7 maýsym kúni Shyǵys Qazaqstan oblysynda Semei qalasynyń mańyndaǵy Ozerki aýylynan 3 shaqyrym jerde Ertis ózeninen balyq aýlaǵan 1951 jyly dúniege kelgen azamat ajal qushty. Jeke qorǵanys quralynsyz júrgen ol sýǵa batqan.
Soltústik Qazaqstan oblysynyń Ǵ.Músirepov aýdanyna qarasty Efimovka aýylynan jarty shaqyrym jerde 1983 jyly dúniege kelgen azamat Esil ózenine sýǵa batqan 2008 jáne 2010 jyly dúniege kelgen balalaryn qutqaramyn dep ajal qushty.
