Aqtaýda №1 mektepte dene shynyqtyrý sabaǵy kezinde 10 jáne 11-synyp oqýshylary tóbelesip, eki 10-synyp oqýshysy aýrýhanaǵa jetkizildi. Olardyń biri aýrýhanaǵa jatqyzylǵan, dep habarlaidy ult.kz.
Lada.kz basylymynyń jazýynsha, oqiǵa 5 qazanda fýtbol oiyny kezinde bolǵan. Zardap shekken oqýshynyń anasynyń aitýynsha, uly men 11-synyp oqýshylarynyń biri arasynda sózge kelispeýshilik týyndaǵan. Onyń sózinshe, janjalǵa keiin basqa joǵary synyp oqýshylary da aralasyp, ulyn birneshe ret urǵan. Ara túsken synyptasy da soqqyǵa jyǵylǵan.
Anasynyń aitýynsha, uly tóbeles kezinde birneshe ret esinen tanyp, keiin basy ainalyp, júregi ainyp, denesinde kógerý men isik paida bolǵan. Ol balasynyń basynan jaraqat alǵanyna alańdap otyr.
Áieldiń sózinshe, oqiǵa kezinde dene shynyqtyrý muǵalimi sabaqta bolǵanymen, janjaldy toqtata almaǵan.
Aqtaý qalalyq bilim bólimi tóbeles bolǵanyn rastady. Vedomstvonyń málimetinshe, oqýshylar arasyndaǵy túsinispeýshilik janjalǵa, keiin tóbeleske ulasqan. Oqiǵadan soń mektepte inspektordyń qatysýymen oqýshylar men ata-analarǵa túsindirý jumystary júrgizilgen.
Politsiia oqiǵaǵa qatysy bar jasóspirimder men olardyń ata-analary bólimshege jetkizilgenin habarlady. Kámeletke tolmaǵandarmen profilaktikalyq áńgime júrgizilip, oqiǵanyń mán-jaiy tekserilgen.
Politsiia málimetinshe, ata-analar bala tárbiesi men oqytý mindetterin tiisinshe oryndamaǵany jáne balalarynyń buzaqylyq áreketteri úshin jaýapkershilikke tartylǵan. Is materialdary Kámeletke tolmaǵandardyń isteri jónindegi komissiiaǵa joldanǵan. Jasóspirimder profilaktikalyq esepke qoiyldy.
Al zardap shekken oqýshynyń anasy janjalǵa qatysty tolyqqandy tekserý júrgizilýin talap etetinin málimdedi.
