Qazaqstanda sońǵy bes jylda ata-anasy bas tartqan balalardyń sany 70 paiyzǵa azaiǵan, dep habarlaidy QazAqparat tilshisi.
«Analar úii» jobasynyń basty nátijesi - 2013 jyldan beri perzenthanada týyp, ata-anasy bas tartatyn, osydan keiin Balalar úiine túsetin balalardyń sany 68 paiyzǵa azaidy. Eger 2013 jyly bul kórsetkish 800 bolsa, qazirgi ýaqytta 310 bolyp otyr», - deidi «Analar úii» Qoǵamdyq qorynyń direktory Baliia Ákimbekova.
Ol bul kórsetkishke úkimettik emes uiymdardyń arqasynda qol jetkizilgenin atap ótti.
«Ata-anasy bas tartqan balalardyń sany azaiyp kele jatqanyn baiqadyq. Eń aldymen, jas analarǵa otbasy bolýǵa jeter baqyt joq ekenin barynsha nasihattaǵymyz keledi», - deidi ol.
Baliia Ákimbekovanyń sózine qaraǵanda, qordyń negizgi mindeti - ata-analardyń týǵan balasyn perzenthanada tastap ketý jaǵdaiynyń aldyn alý.
«Dabyl túskennen keiin bizdiń psihologtar birden sol anaǵa baryp, jumys júrgizedi. Eger jas ana balasynan báribir bas tartatynyn aitsa, biz olarǵa «Analar úiinde» turyp, óz balasyn aialap ósirýdi usynamyz. Mine, dál osy kezde ana oilanýy múmkin. Ol balany kúndelikti kútip-baqqannan keiin oǵan baýyr basyp, jaýapkershilikti sezinetin bolady», - deidi ol.
«Analar úii» qorynyń direktory naqty qai sanattaǵy adamdar kelip jatatynyn aityp berdi.
«Biz bul rette arnaiy taldaý júrgizdik. «Analar úiine» balalar úiiniń burynǵy tárbielenýshileri, tolyq emes otbasynda ósken, zorlyq-zombylyqqa tap bolǵan boijetkender kelip jatady», - deidi ol.
