قازاقستاندا سوڭعى بەس جىلدا اتا-اناسى باس تارتقان بالالاردىڭ سانى 70 پايىزعا ازايعان, دەپ حابارلايدى قازاقپارات تٸلشٸسٸ.
«انالار ٷيٸ» جوباسىنىڭ باستى نەتيجەسٸ - 2013 جىلدان بەرٸ پەرزەنتحانادا تۋىپ, اتا-اناسى باس تارتاتىن, وسىدان كەيٸن بالالار ٷيٸنە تٷسەتٸن بالالاردىڭ سانى 68 پايىزعا ازايدى. ەگەر 2013 جىلى بۇل كٶرسەتكٸش 800 بولسا, قازٸرگٸ ۋاقىتتا 310 بولىپ وتىر», - دەيدٸ «انالار ٷيٸ» قوعامدىق قورىنىڭ ديرەكتورى بالييا ەكٸمبەكوۆا.
ول بۇل كٶرسەتكٸشكە ٷكٸمەتتٸك ەمەس ۇيىمداردىڭ ارقاسىندا قول جەتكٸزٸلگەنٸن اتاپ ٶتتٸ.
«اتا-اناسى باس تارتقان بالالاردىڭ سانى ازايىپ كەلە جاتقانىن بايقادىق. ەڭ الدىمەن, جاس انالارعا وتباسى بولۋعا جەتەر باقىت جوق ەكەنٸن بارىنشا ناسيحاتتاعىمىز كەلەدٸ», - دەيدٸ ول.
بالييا ەكٸمبەكوۆانىڭ سٶزٸنە قاراعاندا, قوردىڭ نەگٸزگٸ مٸندەتٸ - اتا-انالاردىڭ تۋعان بالاسىن پەرزەنتحانادا تاستاپ كەتۋ جاعدايىنىڭ الدىن الۋ.
«دابىل تٷسكەننەن كەيٸن بٸزدٸڭ پسيحولوگتار بٸردەن سول اناعا بارىپ, جۇمىس جٷرگٸزەدٸ. ەگەر جاس انا بالاسىنان بەرٸبٸر باس تارتاتىنىن ايتسا, بٸز ولارعا «انالار ٷيٸندە» تۇرىپ, ٶز بالاسىن ايالاپ ٶسٸرۋدٸ ۇسىنامىز. مٸنە, دەل وسى كەزدە انا ويلانۋى مٷمكٸن. ول بالانى كٷندەلٸكتٸ كٷتٸپ-باققاننان كەيٸن وعان باۋىر باسىپ, جاۋاپكەرشٸلٸكتٸ سەزٸنەتٸن بولادى», - دەيدٸ ول.
«انالار ٷيٸ» قورىنىڭ ديرەكتورى ناقتى قاي ساناتتاعى ادامدار كەلٸپ جاتاتىنىن ايتىپ بەردٸ.
«بٸز بۇل رەتتە ارنايى تالداۋ جٷرگٸزدٸك. «انالار ٷيٸنە» بالالار ٷيٸنٸڭ بۇرىنعى تەربيەلەنۋشٸلەرٸ, تولىق ەمەس وتباسىندا ٶسكەن, زورلىق-زومبىلىققا تاپ بولعان بويجەتكەندەر كەلٸپ جاتادى», - دەيدٸ ول.
