Sońǵy 3 jylda shaǵyn jáne orta biznes jumysyna zańsyz aralasqan 360 laýazymdy tulǵa sottaldy. Bul týraly onlain brifing barysynda QR Sybailas jemqorlyqqa qarsy is-qimyl agenttigi 1-shi departamenti basshysynyń orynbasary Daniiar Aqýan aitty, dep habarlaidy QazAqparat.
«Agenttik shaǵyn jáne orta biznes qyzmetine memlekettik organdardyń zańsyzaralasý faktileriniń jolyn kesý jumystaryn belsendi júrgizip jatyr. Sońǵy 3 jylda jáne osy jyldyń ótken kezeńiniń ishinde bul baǵytta 1 043 faktisiniń joly kesilip, 724 laýazymdy tulǵa jaýapqa tartylsa, onyń 360-y sottaldy», - dedi ol.
Onyń atap ótýinshe, agenttik qabyldanǵan sharalar 1 myńnan astam kásipkerdiń quqyǵyn qorǵaýǵa múmkindik berdi. Bul rette zańsyz áreketterdiń 786 faktisi paraqorlyqqa, 96-sy alaiaqtyqqa jáne 44-i laýazymdyq ókilettigin asyra paidalanýǵa qatysty bolyp otyr.
Sonymen qatar ol memlekettik satyp alý protsedýrasyn ótkizý barysyndaǵy jemqorlyq táýekelderdiń tyiylmai otyrǵandyǵyn basa aitty.
«Máselen, Qostanai oblysynda oblystyq onkologiialyq dispanserdiń bas dárigeri Naýryzov pen onyń orynbasary Bópejanov sottaldy. Olar zerthanalyq zertteýler júrgizýge arnalǵan preparattardy jetkizý boiynsha tólem qujatyna kedergisiz qol qoiǵandary úshin JShS ókilinen 4,4 mln teńge para alǵan»,- dedi Daniiar Aqýan.
