Foto: t.me/antikornews
Sybailas jemqorlyqqa qarsy is-qimyl agenttiginiń Tóraǵasy Ashat Jumaǵali men Oqý-aǵartý ministri Ǵani Beisembaev orta bilim berýdi qarjylandyrý kezinde jemqorlyq táýekelderine syrtqy taldaý júrgizýge kelisti. Mundai sheshim Antikor men QR Oqý-aǵartý ministrliginiń birlesken otyrysynda qabyldandy, dep habarlaidy "Ult aqparat".
Birlesken taldaýdyń bastalýyna bilim berý salasyndaǵy túrli sybailas jemqorlyq qylmystar sebep bolǵan.
"Tek sońǵy 3 jylda osy salada 300-den astam jemqorlyq quqyqbuzýshylyq tirkeldi, olardy jasaýda 200-ge jýyq adam áshkerelendi.
Jalpy qylmystar respýblikanyń barlyq óńirlerine tán bola tura, olardyń eń kóp sany Shymkent qalasyna, Shyǵys Qazaqstan, Túrkistan jáne Qyzylorda oblystaryna tiesili.
Al Qyzylorda, Aqtóbe oblystary men Taldyqorǵan qalasynyń bilim berý salasynyń qyzmetkerlerine qatysty sońǵy rezonanstyq ister eleýli jemqorlyq shemalarynyń bar ekendigin rastaidy" - delingen Antikor habarlamasynda.
Aldyn ala zertteý barysynda qarajatty urlaý biýdjettik ótinimderdi qalyptastyrý satysynda júretini anyqtalǵan. Bul rette mektepterdiń, bilim bólimderiniń jaýapty qyzmetkerleri jáne basqa da adamdar sóz bailasady. Qarjylandyrýdy alǵannan keiin qarajat qalalyq, aýdandyq bilim bólimderine bólinedi, al únemdelgen soma eńbekaqy tóleý qoryna aýdarylady.
Tergeýdiń nusqasy boiynsha mundai tájiribe Taldyqorǵan qalasynyń bilim bóliminiń bas býhgalterine «óli jandarǵa», úlestes tulǵalarǵa esepteý arqyly 2 mlrd teńgege jýyq aqsha urlaýǵa múmkindik bergen. Tintý barysynda kúdiktiden 1 mlrd teńge somasynda aqshalai qarajat tabyldy jáne tárkilendi, onyń edáýir bóligi shetel valiýtasynda boldy.
«Mundai quqyq buzýshylyqtar biýdjettik ótinimderdi qalyptastyrý tetikteriniń jetilmegendigi, bilim berý qyzmetkerlerin ortalyqtandyrylǵan esepke alýdyń bolmaýy jáne osy protsesterdi tsifrlandyrýdyń jetkiliksizdigi nátijesinde múmkin boldy», - dep atap ótti Ashat Jumaǵali.
Keńes qorytyndysy boiynsha bilim berý salasyndaǵy aǵymdaǵy jaǵdaidy ózgertý boiynsha keshendi sharalar belgilendi.
