Soltústik Qazaqstan oblysynyń Ýálihanov aýdanyndaǵy Qairat aýylynyń turǵyndary iri dala órtin óz kúshterimen sóndirýge májbúr bolǵandaryn málimdedi, dep habarlaidy Ult.kz, Arasha.kz-ke silteme jasap.
Áleýmettik jelide jariialanǵan videolarda aýyl turǵyndarynyń órttiń taralýyna jol bermeý úshin traktormen qorǵanys jolaǵyn jyrtyp, jalyndy qolda bar quraldarmen, onyń ishinde shúberekpen sóndirýge tyrysqany kórinedi.
Turǵyndardyń aitýynsha, aýylǵa aparatyn joldyń nasharlyǵy tótenshe jaǵdailar qyzmetiniń jumysyna kedergi keltirgen. Sondai-aq olar órt birneshe kúnge sozylǵan aptap ystyqtan keiin tutanǵanyn jetkizdi.
Aýyl halqy jalynnyń taralýyn aýyldaǵy tehnika men qarapaiym quraldardyń kómegimen toqtatýǵa tyrysqanyn aitady.
Sonymen qatar turǵyndar Soltústik Qazaqstan oblysy Tótenshe jaǵdailar departamentiniń resmi paraqshalarynda Qairat aýylyndaǵy jaǵdai týraly aqparat jariialanbaǵanyna nazar aýdardy. Olardyń sózinshe, vedomstvonyń áleýmettik jelidegi paraqshalarynda kóbine bólimsheniń qyzmetine qatysty imidjdik materialdar men tanymdyq beinerolikter jariialanyp keledi.
Qazirgi ýaqytta oqiǵanyń mán-jaiy men órtti sóndirýge qandai kúshter men tehnikanyń jumyldyrylǵany jóninde resmi aqparat jariialanǵan joq.
