Soltústik Qazaqstan oblysynda koronavirýs infektsiiasyn juqtyrǵandar sany artyp keledi, jańa jaǵdailar Petropavlda jáne óńirdiń 10 aýdanynda tirkeldi, dep habarlaidy "Ult aqparat".
SQO sanitariialyq-epidemiologiialyq baqylaý departamenti baspasóz qyzmetiniń málimetinshe, ótken táýlikte óńirde koronavirýs infektsiiasyn juqtyrýdyń 107 jaǵdaiy tirkeldi.
Onyń tek 58-inde ǵana aýrý belgileri bolǵan. KVI-diń taralýy boiynsha Petropavl alda keledi, munda keshe 44 syrqat anyqtalǵan.
Aiyrtaý aýdanynda – 14, Taiynsha aýdanynda – 13, Qyzyljar aýdanynda – 9, Esil aýdanynda – 7, Mamliýt aýdanynda – 6, M.Jumabaev, Jambyl, Aqjar, Aqqaiyń, Ýálihanov aýdandarynda 1 men 5 aralyǵynda jańa jaǵdailar tirkeldi.
SQO kópbeiindi aýrýhananyń bas dárigeri Iýrii Belonogtyń aitýynsha, emdeý mekemesinde 20 oryndyq koronovirýs bólimi jumys istep jatyr.
Em alýshylardyń basym bóligi – zeinet jasyndaǵylar.
«Koronavirýs bóliminde ókpesi 90-95% zaqymdalǵan syrqattar bar. Olar bir aidan asa em qabyldap jatyr. Densaýlyǵy álsiz, sol sebepti virýsqa tótep bere almai otyr. Qazir bólim tolyq», - deidi Iýrii Belonog.
Mamandardyń aitýynsha, SQO-da koronavirýs juqtyrǵandardyń basym bóligi - 60 jastan asqandar. Olarǵa barlyq syrqattardyń 28% tiesili. Ekinshi orynda 19%-pen 50-59 jastaǵylar tursa, 30-39 jastaǵylar 16 % quraidy.
Búginde óńirde KVI juqtyrǵandardyń sany 10 214-ke jetti. Syrqattanǵandar sany kún saiyn ósip keledi.
«Adamdar saqtyq sharalaryn umytyp barady. Áleýmettik ara qashyqtyqty ustaný, meditsinalyq maska taǵý - virýstyń aldyn alý sharalary. 1 aqpannan bastap KVI-ge qarsy vaktsinatsiialaý bastalady. Ol ne úshin jasalady? Koronovirýs adam aǵzasyndaǵy ózge aýrýlardy qozdyrsa, vaktsina sol aýrýlardyń ýshyǵyp ketpeýi úshin qoiylady. Ókinishke orai álemniń esh memleketi ázirge virýsty tolyǵymen joiatyn vaktsinany oilap tapqan joq», - deidi bas dáriger.
