Soltústik Qazaqstan oblysynyń Ǵabit Músirepov aýdanynda birneshe ózen arnasynan tasyp, úsh aýylda ondaǵan úidi sý basty, - dep habarlaidy Azattyq tilshisi.
Oblystyq tótenshe jaǵdailar departamentiniń aqparatyna qaraǵanda, keshe aýdanda Jembaraq ózeni tasyp, saldarynan keshke qarai Rýzaev aýylynda 185 úidi sý basty. Aýyldan 578 adam, onyń ishinde 110 bala qaýipsiz jerge kóshirildi. Rýzaev aýylynda barlyǵy 14 kósheni sý alǵan. 92 bas mal qyrylyp, 2000-ǵa jýyq bas mal qaýipsiz jerge kóshirildi.
Aqqanburlyq ózeni tasyp, Chistopole aýylynda 19 úi sý astynda qaldy. 54 adam qaýipsiz jerge kóshirildi. Sonymen qatar osy aýdandaǵy Sharyq ózeni de arnasynan shyǵyp, Raisovka aýylynda 30 úi sý astyna ketti. Bul aýyldan 70 adam men 110 mal úi janýary qaýipsiz jerge kóshirildi.
Rýzaev aýylynda 1389 úide 3904 adam, Chistopole aýylynda 814 úide 2329 jan turady. Raisovka aýylynda 220 úide 775 adam turady.
Sý basqan aýyldarda tótenshe jaǵdailar qyzmetiniń operativti shtaby jumys istep jatyr. Sý tasý saldarynan Kókshetaý-Rýzaev tas joly jabylǵan.
