Búgin Úkimet otyrysynda Soltústik Qazaqstan men Qostanai oblystarynyń ákimderi qus tumaýy máselesine qatysty esep berdi, dep habarlaidy "Ult aqparat".
«Bizdiń oblyspen shekaralas ornalasqan Reseidiń óńirlerinde qus tumaýy paida bolyp, biraz qus qyryldy. Saldarynan qus tumaýy bizge de tarady. 28 tamyzda qus fabrikalarynyń basshylarymen shuǵyl keńes ótkizilip, onda aýrýdyń taralýyna jol bermeýdiń algoritmi ázirlendi. Degenmen oblys aýmaǵynda qus tumaýy tirkelip, 450 myń fakti anyqtaldy», - dedi SQO ákimi Qumar Aqsaqalov.
Osy oraida ákim aýrýdyń úi qustaryna taralýyna jabaiy qustar áser etkenin jetkizdi.
«Diagnoz rastalǵan eldi mekenderde karantin rejimi belgilendi, vaktsinanyń 873 myń dozasy bólindi, 554 myń qusqa ekpe jasaldy. Qus ielerine 66 mln teńge ótemaqy tólendi. Osy baǵytta jumys jalǵasady. Aýyl sharýashylyǵy ministrligine ótemaqy tóleý úshin qosymsha qarajat bólý týraly ótinim joldadyq», - dedi Q. Aqsaqalov
Onyń aitýynsha, oblysta zardap shekken qus fabrikasyn qalpyna keltirý jospary ázirlendi. Balapan satyp alýǵa qarjylai qoldaý tetigi qarastyrylýda.
Óz kezeginde Qostanai oblysynyń ákimi Arhimed Muhambetov sońǵy 17 kúnde qustar arasynda ólim tirkelmegenin jetkizdi.
«Jeke úi aýlasyna arnalǵan vaktsinanyń 491 myń dozasy alyndy, vaktsinalaý sharalary aiaqtaldy. Sonymen qatar qus fabrikalary óz qarajaty esebinen 625 myń qusqa ekpe jasady. Jalpy somasy 45 mln 500 teńge quraityn 35,3 myń qustyń qunyn óteý úshin qujattar joldandy. 2543 qus úshin 7,5 mln teńge somasynda ótemaqy tólendi, bul baǵyttaǵy jumystar jalǵasýda», - dedi A. Muhambetov.
Aita keteiik, Aýyl sharýashylyǵy ministri Saparhan Omarov patogendi qus tumaýynan 873,9 myń qus qyrylǵanyn málim etti.
