Amerika arnaiy qyzmetiniń burynǵy qyzmetkeri Edvard Snoýden 2 qarashada Resei azamattyǵyna ótinish tapsyratynyn habarlady. Ol AQSh azamattyǵynan da bas tartpaitynyn málimdedi.
2013 jyly AQSh arnaiy qyzmetiniń amerikalyqtar men shetel azamattaryn ańdityn baǵdarlamasy bar ekenin áshkerelep, elden qashyp ketken Snoýden Reseidi panalaǵan edi.
37 jastaǵy Snoýden azamattyq jaily málimdeme jasamai turyp, bir kún buryn áieli Lindsi Millstiń aiaǵy aýyr ekenin aitqan. Qazan aiynda Resei úkimeti oǵan elde turaqty turýǵa ruqsat bergen.
“Ata-anamyzdan jyraq ketkeli beri áielim ekeýimiz ulymyzdan ajyramaý qajettigin túsindik. Sol sebepti indetke bailanysty shekara jabylǵan shaqta AQSh-Resei qos azamattyǵyna ótinish berip otyrmyz. Lindsi ekeýimiz balamyzǵa ózimiz jaqsy kóretin Amerika qundylyqtaryn, onyń ishinde oiyńdaǵyny búkpei aitý qasietin sińirip ósiremiz” dep jazdy Snoýden Twitter-de.
Ol AQSh-qa oralyp, týǵan-týystarymen qaýysha alatyn kúndi asyǵa kútip júrgenin de jazǵan.
Máskeý jaqynda azamattyq berý tártibin jumsartyp, adamnyń týǵan jerinde berilgen qujattan bas tartpai-aq Resei azamattyǵyn alýǵa múmkindik beretin erejeni bekitken.
Edvard Snoýden ár jyldary AQSh ortalyq barlaý basqarmasy jáne ulttyq qaýipsizdik agenttigine jumys istegen. 2013 jyly ol qatardaǵy azamattardyń telefondaryn arnaiy qyzmetter qalai tyńdaityny týraly qupiia derek-qujattardy jýrnalisterge bergen edi. Snoýden áshkere qylǵan jait AQSh pen onyń Eýropadaǵy seriktes memleketteri, sonyń ishinde Germaniiamen arasyndaǵy qarym-qatynastarǵa syzat túsirgen. AQSh quqyq organdarynan qashqan Snoýden 2013 jyly jazda aldymen Gonkongke, keiin Reseige bardy.
AQSh biligi Edvard Snoýdenge memlekettik múlikti urlaǵan, qorǵanys salasynda mańyzy bar qupiia aqparatty zańsyz paidalanǵan, sonymen birge memlekettik qupiiaǵa jatatyn málimetterdi ádeii jariialaǵan degen aiyptar taqqan. Bul aiyptar boiynsha ol 30 jylǵa sottalýy múmkin.
AQSh prezidenti Donald Tramp tamyz aiynda Snoýdenge keshirim berý oiynda baryn aitqan, al qyrkúiek aiynda Snoýden Frantsiia prezidenti Emmanýel Makrondy ózine saiasi baspana berýge shaqyrǵan.
