Premer-ministr Álihan Smaiylov azyq-túlik baǵasyna syrtqy faktorlar qalai áser etetinin aitty, dep habarlaidy Sputnik Qazaqstan.
Jazda ońtústik aimaqtarda jańa ónim jinalsa da, keibir kókónister qymbat boldy.
"Máselen, jazda Túrkistan oblysynda piiazdyń baǵasy 80-90 teńge bolǵan. Al biylǵy geosaiasi oqiǵalar men álemdegi azyq-túlik problemasyna bailanysty kórshi elderdiń treiderleri bizge kelip, daladan piiazdy kelisine 200 teńgeden satyp alýǵa kiristi. Árine, fermerler qarsy bolmaidy, ózine tiimdi baǵamen satady. Sol kezde piiaz baǵasynyń ósýine áser etken ishki faktorlar bolǵan joq. Biraq jańaǵy syrtqy faktor áser etti. Sonyń saldarynan bizde piiazdyń baǵasy ósip ketti. Ondai mysaldar az emes", - dedi Smaiylov Cenat otyrysynan keiingi brifingte.
Osy oraida Úkimet basshysy taýardyń 40 protsenti Reseiden jetkiziletinin eske saldy. Ol jaqta importtyń kólemi kúrt qysqarǵannan keiin rýbl baǵamy 30 protsentke kúsheidi, biraq reseilik valiýtaǵa shaqqandaǵy teńgeniń baǵamy túsip ketti. Qazaqstanǵa keletin reseilik taýarlar da qymbattady.
"Biz importty toqtata almaimyz. Sebebi azyq-túlik pen óndiris taýarlaryn alýymyz kerek. Sondyqtan qalasaq ta, qalamasaq ta, syrtqy faktorlar bizdegi baǵalarǵa áser etedi", - dep túsindirdi Smaiylov.
Onyń aitýynsha, syrtqy faktorlardyń áserin azaitý úshin importtyq taýarlardy barynsha óz ónimimizben almastyrý qajet. Osy salada tiisti investitsiialyq jobalar qolǵa alyndy.
