Foto: Rrimeminister.kz
Premer-ministr Álihan Smaiylovtyń tóraǵalyǵymen ótken keńeste biznestiń problemalyq máselelerin sheshý, sondai-aq kásipkerlik sýbektilerine qoiylatyn negizsiz talaptardy qaita qaraý jáne qysqartý jónindegi jumys barysy qaraldy, - dep habarlaidy "Ult aqparat" Rrimeminister.kz saityna silteme jasap.
Ulttyq ekonomika birinshi vitse-ministri Timýr Jaqsylyqov 44 qyzmettiń 26 salasynda retteýshi aktilerdi taldaý jalǵasyp jatqanyn habarlady. Bul jumysty 2023 jyldyń birinshi toqsanynda aiaqtaý josparlanýda. Bul rette memlekettik organdar buryn taldanǵan 18 sala, onyń ishinde aýyl sharýashylyǵy, qurylys, munai óndirý, kólik jáne saýda boiynsha quqyqtyq jáne zańnamalyq aktilerge ózgerister men tolyqtyrýlar engizý rásimine kiristi.
Premer-ministr basqa salalardaǵy retteýshi aktilerdi taldaýdy tezdetý qajettigine nazar aýdardy jáne osy jumysty jyl sońyna deiin aiaqtaýdy tapsyrdy. Onyń aitýynsha, bizneske qoiylatyn artyq talaptardy joiý úshin zańnamalyq ózgerister jedel engizilýi tiis.
"Tezdetý kerek. "Atameken" UKP tarapynan qoldaý tapqan jáne maquldanǵan talaptar boiynsha zańnamany "tazartý" qajet: bul normalardy buiryqtar men qaýlylardan alyp tastaý kerek. Taldaý jumysy aiaqtalǵansha kútpeńizder. Qajetsiz talaptar anyqtaldy ma? Jumysyn toqtatý úshin olardy joiý boiynsha dereý sharalar qabyldaý qajet", - dedi Álihan Smaiylov.
Sondai-aq, keńeste biznestiń problemalyq, onyń ishinde Otandyq kásipkerler keńesiniń otyrystarynda kóterilgen máselelerdi sheshý boiynsha tapsyrmalardy oryndaý barysy qaraldy.
"Biznes Úkimettiń aldynda problemalary týraly másele kóteredi, al biz olar boiynsha óz ustanymymyzdy bildiremiz. Árkezde ortaq pikirge kele bermeýimiz de múmkin, óitkeni Úkimet biýdjet múmkindikterin, barlyq áleýmettik-ekonomikalyq jaǵdaidy eskere otyryp sheshim qabyldaidy. Biraq kásipkerler qashanda kelispeitin tustaryn aita alady. Biz dialogqa daiynbyz, osy taqyryptardy talqylap, kelisilgen sheshimder qabyldaimyz", - dedi Álihan Smaiylov.
Premer-ministr memlekettik organdardyń jumysyndaǵy máseleler boiynsha naqty keste qurýdy jáne jyl sońyna deiin olardyń Ulttyq palatamen birlesip qaralýyn qamtamasyz etýdi tapsyrdy.
"Bul protseske serpin berip, sheshim qabyldaý merzimin qysqartý kerek. "Temirdi qyzǵan kezinde soq", máselelerdi qazir sheshý kerek. Túptep kelgende, biz kásip ieleri tiisti jobalaryn iske qosyp, jumys oryndaryn qurýy jáne eldegi áleýmettik-ekonomikalyq jaǵdaidy jaqsartyp, halyqtyń tabysyn arttyrýy úshin ońtaily biznes ahýal qalyptastyrýǵa jumys isteimiz. Barlyq memlekettik organdar, bizdiń barsha áriptesterimiz osyny eskerýi tiis", - dep túiindedi Álihan Smaiylov.
Talqylaýǵa Premer-Ministrdiń orynbasary – qarjy ministri Erulan Jamaýbaev, «Atameken» UKP tóralqasynyń tóraǵasy Raiymbek Batalov jáne t. b. qatysty.
