QR Premer-Ministri Álihan Smaiylovtyń tóraǵalyǵymen ótken Úkimet otyrysynda kún tártibinen tys ishki naryqty janar-jaǵarmai materialdarymen qamtamasyz etý máselesi qaraldy, dep habarlaidy primeminister.kz saity.
Energetika ministri Bolat Aqsholaqov ishki naryqty munai ónimderiniń qajetti kólemimen qamtamasyz etý úshin janarmai beketteri men munai bazalaryndaǵy otyn qory ulǵaitylǵanyn, ony jetkizý baǵyttary ońtailandyrylǵanyn, ónimsiz deldaldardy alyp tastaý jáne QR aýmaǵynan otyn shyǵarýdy shekteý boiynsha sharalar qabyldanǵanyn aitty.
Budan basqa, Energetika ministrliginde jáne janarmai beketteriniń iri jelilerinde janar-jaǵarmai baǵasyn negizsiz kóterý jáne ony satýdan bas tartý máseleleri boiynsha azamattardyń ótinishterine jedel jaýap berý úshin koll-ortalyqtar quryldy.
Premer-Ministr janarmai naryǵyndaǵy jaǵdaidy turaqtandyrý úshin Úkimettiń barlyq qajetti shuǵyl sharalardy qabyldaǵanyn atap ótti. Ár oblysta munai bazalary men usaq janar-jaǵarmai quiý beketterin baqylaý jónindegi komissiialar quryldy, zaýyttarda munai óńdeý jáne dizel otynyn óndirý kólemi ulǵaityldy, sondai-aq zaýyttardan munai bazalaryna jáne barlyq óńirdegi janarmai quiý beketterine deiin munai ónimderiniń logistikasy jolǵa qoiyldy.
«Munai ónimderin áketýge jol bermeý maqsatynda qajetti eksporttyq shekteýler engizildi, dizel otyny ishki naryqqa deldaldarsyz jetkiziledi. Qabyldanyp jatqan sharalardyń nátijesinde janar-jaǵarmai naryǵyndaǵy ahýal bir qalypqa kelip jatyr», — dedi Álihan Smaiylov.
Degenmen jaǵdaidy únemi nazarda ustap, qatań baqylaý qajet. Mysaly, keibir óńirlerde suiytylǵan gaz tapshylyǵy paida boldy.
«Sondyqtan keshendi jumysty odan ári jalǵastyrý kerek, óńirlerde otyn tapshylyǵy men irkilister bolmaýy tiis», — dedi Premer-Ministr.
Sóz sońynda Álihan Smaiylov 15 qyrkúiekten bastap janarmai quiý stantsiialarynda janar-jaǵarmai bosatýdy esepke alýdyń tsifrlyq júiesin engizýdi, aýyl sharýashylyǵy óndirýshileri úshin jeńildikti dizel otynyn bólý júiesin engizýdi qamtamasyz etýdi, sondai-aq óńirlerdegi halyqty suiytylǵan gazben qamtamasyz etý boiynsha sharalar qabyldaýdy tapsyrdy.
Sonymen qatar 2023 jyldan bastap Energetika ministrligine munai ónimderin satý kezinde ónimsiz deldaldardy qatystyrmaityn munai óńdeýdiń jańa júiesine kóshý tapsyryldy.
