Foto: primeminister.kz
QR Premer-Ministri Álihan Smaiylov QR Prezidenti Qasym-Jomart Toqaevtyń «Ádiletti Qazaqstan: bárimiz jáne árqaisymyz úshin. Qazir jáne árdaiym» sailaýaldy baǵdarlamasyn iske asyrý jónindegi respýblikalyq shtabtyń otyrysyn ótkizdi, dep habarlaidy "Ult aqparat" Úkimet basshysynyń baspasóz qyzmetine silteme jasap.
Jiynǵa qatysýshylar stýdenttik jataqhanalardaǵy oryn tapshylyǵy máselesin talqylady.
Ǵylym jáne joǵary bilim ministri Saiasat Nurbek biyl 11 myń oryndyq 37 nysan, onyń ishinde JOO stýdentterine arnalǵan – 26, kolledj stýdentterine arnalǵan 11 jataqhana paidalanýǵa beriletinin aitty.
Bul rette, onyń aqparaty boiynsha, 1,4 myń oryndyq 4 nysan josparly merziminde paidalanýǵa berilmeýi múmkin. Bul - «Astana meditsina ýniversiteti» KEAQ jataqhanasyn kúrdeli jóndeý, Almaty qalasynda 400 oryndyq jataqhana salý jáne 450 oryndyq eki jataqhanaǵa kúrdeli jóndeý júrgizý syndy jobalar.
Ministr jataqhanalar qurylysy kezinde investorlar kezigetin negizgi problemalar qatarynda nysandardyń maqsatyn ózgertý, zattai granttar berý jáne kommýnaldyq jelilerge qosylý múmkindiginiń shektelýindegi qiyndyqtardy atady.
Álihan Smaiylov eger bul másele ýaqtyly sheshilmeitin bolsa, jaǵdai odan saiyn qiyndai beretinin atap ótti.
«Kóptegen ýniversitetterdiń basshylary stýdentterge tiisti jaǵdai jasaý ózderiniń tikelei mindeti ekenin is júzinde umytyp ketti deýge bolady. Óz kezeginde Ǵylym jáne joǵary bilim, Oqý-aǵartý ministrlikteri ýniversitetter men kolledjderdiń syrttan kelgen stýdentterdi jataqhanamen tolyq qamtamasyz etý talaptarynyń oryndalýyna qatysty jaǵdaidy baqylap otyrǵan joq. Sondai-aq ákimdikterdiń tarapynan da úilestirý jumystary nashar», — dedi Premer-Ministr.
Onyń aitýynsha, oqýǵa qabyldanǵan stýdentter jataqhanada oryn joq ekenin ornalasýǵa kelgen kezde bir-aq biledi. Sosyn, oqýǵa daiyndalýdyń ornyna olar óz betinshe turatyn baspana izdeýge májbúr bolady.
Álihan Smaiylov 1 qyrkúiekke deiin stýdentterge jataqhanadan oryn bólý jumystaryn barynsha kúsheitýdi, sondai-aq biylǵa josparlanǵan 37 nysannyń barlyǵynyń merziminde tapsyrylýyn qamtamasyz etýdi mindettedi. Ol úshin ǵylym jáne joǵary bilim, oqý-aǵartý ministrleri, oblys ákimderi tikelei jaýapty ekenin atap ótti.
Shtab otyrysy barysynda Memleket basshysynyń aýyl halqynyń tabysyn arttyrý jónindegi «Aýyl amanaty» baǵdarlamasyn iske asyrý týraly tapsyrmasyn oryndaý máselesi de qaraldy.
Aýyl sharýashylyǵy ministri Erbol Qarashókeev biyl Baǵdarlamany júzege asyrýǵa respýblikalyq biýdjetten 100 mlrd teńge qarastyrylyp, 17 myń shaǵyn nesie berý josparlanǵanyn, bul aýyldarda 18 myńnan astam jańa jumys ornyn ashýǵa múmkindik beretinin aitty.
Degenmen Baǵdarlamany júzege asyrýǵa on oblys qana belsendi túrde kirisken. Jeti óńirde jumys qarqyny baiaý, al úsh óńirde birde-bir ótinim (Shyǵys Qazaqstan, Mańǵystaý jáne Abai oblystary) maquldanbaǵan.
«Halyqpen belsendi jumys isteý kerek. Aýdandar men aýyldyq okrýgterdiń ákimderi turǵyndarmen turaqty bailanysta bolyp, mikrokredittiń sharttary men paidasyn túsindirýge tiis. 5-7 jylǵa 2,5%-ben nesie berý óte tiimdi shart bolyp tabylady. Muny qarapaiym tilmen jáne durys túsindirý kerek», — dedi Premer-Ministr.
Álihan Smaiylov oblys ákimdikterine berilgen qarajattyń tolyq igerilýin, olardyń maqsatty paidalanylýyn ári ýaqtyly qaitarylýyn qamtamasyz etýdi, sondai-aq 2023 jylǵa arnalǵan Baǵdarlama kórsetkishterine qol jetkizýdi baqylaýda ustaýdy tapsyrdy.
