فوتو: primeminister.kz
قر پرەمەر-مينيسترٸ ەليحان سمايىلوۆ قر پرەزيدەنتٸ قاسىم-جومارت توقاەۆتىڭ «ەدٸلەتتٸ قازاقستان: بەرٸمٸز جەنە ەرقايسىمىز ٷشٸن. قازٸر جەنە ەردايىم» سايلاۋالدى باعدارلاماسىن ٸسكە اسىرۋ جٶنٸندەگٸ رەسپۋبليكالىق شتابتىڭ وتىرىسىن ٶتكٸزدٸ, دەپ حابارلايدى "ۇلت اقپارات" ٷكٸمەت باسشىسىنىڭ باسپاسٶز قىزمەتٸنە سٸلتەمە جاساپ.
جيىنعا قاتىسۋشىلار ستۋدەنتتٸك جاتاقحانالارداعى ورىن تاپشىلىعى مەسەلەسٸن تالقىلادى.
عىلىم جەنە جوعارى بٸلٸم مينيسترٸ ساياسات نۇربەك بيىل 11 مىڭ ورىندىق 37 نىسان, ونىڭ ٸشٸندە جوو ستۋدەنتتەرٸنە ارنالعان – 26, كوللەدج ستۋدەنتتەرٸنە ارنالعان 11 جاتاقحانا پايدالانۋعا بەرٸلەتٸنٸن ايتتى.
بۇل رەتتە, ونىڭ اقپاراتى بويىنشا, 1,4 مىڭ ورىندىق 4 نىسان جوسپارلى مەرزٸمٸندە پايدالانۋعا بەرٸلمەۋٸ مٷمكٸن. بۇل - «استانا مەديتسينا ۋنيۆەرسيتەتٸ» كەاق جاتاقحاناسىن كٷردەلٸ جٶندەۋ, الماتى قالاسىندا 400 ورىندىق جاتاقحانا سالۋ جەنە 450 ورىندىق ەكٸ جاتاقحاناعا كٷردەلٸ جٶندەۋ جٷرگٸزۋ سىندى جوبالار.
مينيستر جاتاقحانالار قۇرىلىسى كەزٸندە ينۆەستورلار كەزٸگەتٸن نەگٸزگٸ پروبلەمالار قاتارىندا نىسانداردىڭ ماقساتىن ٶزگەرتۋ, زاتتاي گرانتتار بەرۋ جەنە كوممۋنالدىق جەلٸلەرگە قوسىلۋ مٷمكٸندٸگٸنٸڭ شەكتەلۋٸندەگٸ قيىندىقتاردى اتادى.
ەليحان سمايىلوۆ ەگەر بۇل مەسەلە ۋاقتىلى شەشٸلمەيتٸن بولسا, جاعداي ودان سايىن قيىنداي بەرەتٸنٸن اتاپ ٶتتٸ.
«كٶپتەگەن ۋنيۆەرسيتەتتەردٸڭ باسشىلارى ستۋدەنتتەرگە تيٸستٸ جاعداي جاساۋ ٶزدەرٸنٸڭ تٸكەلەي مٸندەتٸ ەكەنٸن ٸس جٷزٸندە ۇمىتىپ كەتتٸ دەۋگە بولادى. ٶز كەزەگٸندە عىلىم جەنە جوعارى بٸلٸم, وقۋ-اعارتۋ مينيسترلٸكتەرٸ ۋنيۆەرسيتەتتەر مەن كوللەدجدەردٸڭ سىرتتان كەلگەن ستۋدەنتتەردٸ جاتاقحانامەن تولىق قامتاماسىز ەتۋ تالاپتارىنىڭ ورىندالۋىنا قاتىستى جاعدايدى باقىلاپ وتىرعان جوق. سونداي-اق ەكٸمدٸكتەردٸڭ تاراپىنان دا ٷيلەستٸرۋ جۇمىستارى ناشار», — دەدٸ پرەمەر-مينيستر.
ونىڭ ايتۋىنشا, وقۋعا قابىلدانعان ستۋدەنتتەر جاتاقحانادا ورىن جوق ەكەنٸن ورنالاسۋعا كەلگەن كەزدە بٸر-اق بٸلەدٸ. سوسىن, وقۋعا دايىندالۋدىڭ ورنىنا ولار ٶز بەتٸنشە تۇراتىن باسپانا ٸزدەۋگە مەجبٷر بولادى.
ەليحان سمايىلوۆ 1 قىركٷيەككە دەيٸن ستۋدەنتتەرگە جاتاقحانادان ورىن بٶلۋ جۇمىستارىن بارىنشا كٷشەيتۋدٸ, سونداي-اق بيىلعا جوسپارلانعان 37 نىساننىڭ بارلىعىنىڭ مەرزٸمٸندە تاپسىرىلۋىن قامتاماسىز ەتۋدٸ مٸندەتتەدٸ. ول ٷشٸن عىلىم جەنە جوعارى بٸلٸم, وقۋ-اعارتۋ مينيسترلەرٸ, وبلىس ەكٸمدەرٸ تٸكەلەي جاۋاپتى ەكەنٸن اتاپ ٶتتٸ.
شتاب وتىرىسى بارىسىندا مەملەكەت باسشىسىنىڭ اۋىل حالقىنىڭ تابىسىن ارتتىرۋ جٶنٸندەگٸ «اۋىل اماناتى» باعدارلاماسىن ٸسكە اسىرۋ تۋرالى تاپسىرماسىن ورىنداۋ مەسەلەسٸ دە قارالدى.
اۋىل شارۋاشىلىعى مينيسترٸ ەربول قاراشٶكەەۆ بيىل باعدارلامانى جٷزەگە اسىرۋعا رەسپۋبليكالىق بيۋدجەتتەن 100 ملرد تەڭگە قاراستىرىلىپ, 17 مىڭ شاعىن نەسيە بەرۋ جوسپارلانعانىن, بۇل اۋىلداردا 18 مىڭنان استام جاڭا جۇمىس ورنىن اشۋعا مٷمكٸندٸك بەرەتٸنٸن ايتتى.
دەگەنمەن باعدارلامانى جٷزەگە اسىرۋعا ون وبلىس قانا بەلسەندٸ تٷردە كٸرٸسكەن. جەتٸ ٶڭٸردە جۇمىس قارقىنى باياۋ, ال ٷش ٶڭٸردە بٸردە-بٸر ٶتٸنٸم (شىعىس قازاقستان, ماڭعىستاۋ جەنە اباي وبلىستارى) ماقۇلدانباعان.
«حالىقپەن بەلسەندٸ جۇمىس ٸستەۋ كەرەك. اۋداندار مەن اۋىلدىق وكرۋگتەردٸڭ ەكٸمدەرٸ تۇرعىندارمەن تۇراقتى بايلانىستا بولىپ, ميكروكرەديتتٸڭ شارتتارى مەن پايداسىن تٷسٸندٸرۋگە تيٸس. 5-7 جىلعا 2,5%-بەن نەسيە بەرۋ ٶتە تيٸمدٸ شارت بولىپ تابىلادى. مۇنى قاراپايىم تٸلمەن جەنە دۇرىس تٷسٸندٸرۋ كەرەك», — دەدٸ پرەمەر-مينيستر.
ەليحان سمايىلوۆ وبلىس ەكٸمدٸكتەرٸنە بەرٸلگەن قاراجاتتىڭ تولىق يگەرٸلۋٸن, ولاردىڭ ماقساتتى پايدالانىلۋىن ەرٸ ۋاقتىلى قايتارىلۋىن قامتاماسىز ەتۋدٸ, سونداي-اق 2023 جىلعا ارنالعان باعدارلاما كٶرسەتكٸشتەرٸنە قول جەتكٸزۋدٸ باقىلاۋدا ۇستاۋدى تاپسىردى.
