Birikken Arab Ámirlikterine resmi sapary barysynda QR Premer-Ministri Álihan Smaiylov BAÁ Premer-Ministriniń orynbasary – Prezident Ákimshiliginiń ministri sheih Mansýr ben Zaid Ál Nahaianmen kezdesý ótkizdi, dep habarlaidy "Ult aqparat" primeminister.kz saityna silteme jasap.
Álihan Smaiylov Qazaqstan men BAÁ arasynda syndarly saiasi dialog ornatylǵanyn jáne ekijaqty yntymaqtastyqtyń joǵary deńgeiine qol jetkizilgenin atap ótti. Úkimet basshysynyń aitýynsha, oǵan eń joǵary deńgeidegi turaqty bailanystar yqpal etip otyr.
«Birikken Arab Ámirlikteri – Qazaqstannyń óńirdegi negizgi saýda-ekonomikalyq seriktesi. Ámirlikter bizdiń elmen taýar ainalymy boiynsha arab elderi arasynda kósh bastap tur», — dedi Premer-Ministr.
Máselen, 2021 jyldyń qorytyndysy boiynsha ózara taýar ainalymy $709 mln boldy, bul kórsetkish ótken jylmen salystyrǵanda 50%-ǵa jýyq artty.
«Bul – jaqsy nátije, alaida biz ózara saýda nomenklatýrasyn odan ári keńeitý boiynsha birlesip kúsh-jiger jumsai alamyz», — dedi Álihan Smaiylov.
Sonymen qatar Úkimet basshysy sońǵy jyldary BAÁ-den Qazaqstanǵa investitsiialardyń júieli túrde ósip kele jatqanyn atap ótti. Ótken jyldyń qorytyndysy boiynsha bul kórsetkish 43%-ǵa ósip, $250 mln-ǵa jetti. Bul trend biyl da saqtalyp otyr.
«Biz taý-ken metallýrgiia kesheni, aýyl sharýashylyǵy, munai himiiasy, energetika, geologiia siiaqty salalarda investitsiialyq yntymaqtastyqty arttyrý jáne tereńdetý úshin aitarlyqtai áleýetti baiqap otyrmyz. Atalǵan salalar bizdiń strategiialyq maqsattarymyzǵa sai keledi», — dedi Smaiylov.
Osyǵan bailanysty sheih Mansýr ben Zaid Ál Nahaianǵa jalpy somasy $6,5 mlrd-tan asatyn perspektivalyq investitsiialyq jobalardyń tizimi qaraýǵa berildi. Bul rette ónerkásiptegi, energetikadaǵy, bank sektoryndaǵy jáne aýyl sharýashylyǵyndaǵy, onyń ishinde birlesken venchýrlik qor qurý, qant zaýytyn salý jáne kaltsii qosylǵan soda óndirisin iske qosý boiynsha eń iri bes jobaǵa basa nazar aýdaryldy.
«Qazaqstan Úkimeti BAÁ-men barlyq baǵyttar boiynsha ózara tiimdi yntymaqtastyqty tereńdetýge jáne nyǵaitýǵa nietti», — dep túiindedi Premer.
Kezdesý qorytyndysy boiynsha ekologiia, saýda, mádeniet jáne bilim berý salalarynda birqatar ekijaqty vedomstvoaralyq qujattarǵa qol qoiyldy.
Óz kezeginde sheih Mansýr ben Zaid Ál Nahaian bul sapardyń eki el arasyndaǵy yntymaqtastyqty nyǵaitý úshin mańyzy erekshe ekenin atap kórsetti.
Ol Qazaqstannyń BAÁ-niń Ortalyq Aziia óńirindegi jetekshi áriptesteriniń biri ekenin aitty. Sondai-aq bank salasy men aýyl sharýashylyǵynda, onyń ishinde qant jáne sút ónimderin óndirý boiynsha birlesken jobalardy iske asyrýǵa múddeli ekenin bildirdi.
Sheih Mansýr ben Zaid Ál Nahaian Qazaqstan Úkimeti basshysynyń osy sapary eki el arasyndaǵy qatynastardy joǵary deńgeige kóterýge yqpal etetinine senim bildirdi.
