QR Premer-Ministri Álihan Smaiylov Astanada ótken TMD Úkimet basshylary keńesiniń otyrysynda tóraǵa retinde sóz sóiledi, dep habarlaidy "Ult aqparat" primeminister.kz saityna silteme jasap.
Sharaǵa Ázerbaijannyń Úkimet basshysy Ali Asadov, Belarýs Premer-Ministri Roman Golovchenko, Qyrǵyzstan Ministrler kabinetiniń tóraǵasy Aqylbek Japarov, Reseidiń Úkimet basshysy Mihail Mishýstin, Tájikstan Premer-Ministri Kohir Rasýlzoda, Ózbekstan Premer-Ministri Abdýlla Aripov, sondai-aq Armeniia Premer-Ministriniń orynbasary Mger Grigorian jáne Túrikmenstan Ministrler kabineti tóraǵasynyń orynbasary Hodjamyrat Geldimyradov qatysty.
Álihan Smaiylov ótken jyldary TMD elderi múddeler teńgerimin saqtai otyryp, ózara senim men pragmatizmge negizdelgen kóp qyrly yntymaqtastyqqa qol jetkizgenin atap ótti.
«Bizdiń ózara qarym-qatynastarymyz álemdik ekonomikada qalyptasyp otyrǵan jaǵymsyz úrdisterdi azaitýǵa múmkindik berip, tiimdi áriptestikti damytýǵa yqpal etedi. Uiym aiasynda qabyldanǵan sharalardyń arqasynda bilim berý, meditsinalyq-áleýmettik jáne azamattyq-quqyqtyq sipattaǵy kóptegen máseleler oń sheshimin tapty», — dedi Premer-Ministr.
Onyń aitýynsha, Qazaqstannyń tóraǵalyǵy aiasynda barlyq basym baǵyttardaǵy yntymaqtastyqty tereńdetý boiynsha naqty jumys júrgizildi. Atap aitqanda, saýda-ekonomikalyq salaǵa erekshe nazar aýdaryldy.
«Ózara is-qimyl negizinen pandemiianyń zardaptaryn azaitý boiynsha kelisilgen sharalardy júzege asyrýǵa baǵyttaldy. Búgin biz onyń naqty nátijelerin kórip otyrmyz, iaǵni memleketterimizdiń ekonomikalary birtindep qalpyna kelip, iskerlik belsendilik arta túsýde», — dedi Álihan Smaiylov.
Sonymen qatar Úkimet basshysy TMD sheńberinde qabyldanǵan Týyndaityn problemalarǵa birlesip den qoiý sharalary tizbesiniń mańyzyn atap ótti. Ol ózara investitsiialardy yntalandyrýdy, ónerkásip kooperatsiiasyn tereńdetýdi, kedendik retteýdi jeńildetýdi, jańa logistikalyq tizbekterdi qalyptastyrýdy jáne tsifrlyq tehnologiialardy engizýdi kózdeidi.
Odan bólek, Premer-Ministr jastar jáne ǵylymi salalardaǵy bailanystardy nyǵaitý jónindegi qadamdardyń joǵary tiimdiligin atap ótti. Atap aitqanda, biyl qabyldanǵan Perspektivaly ǵylymi jobalardyń tizbesi aqparattyq tehnologiialar, nanomaterialdar jáne gendik injeneriia, qorshaǵan ortany qorǵaý jáne klimattyń ózgerýi, jańartylatyn energetika jáne ǵaryshty zertteý siiaqty salalardaǵy ózara is-qimyldy keńeitýge múmkindik beredi.
Onyń aitýynsha, TMD keńistiginde qaýipsizdikti qamtamasyz etý, onyń ishinde aqparattyq saladaǵy qaýip-qaterlerge qarsy is-qimyl jáne mádeni-gýmanitarlyq saladaǵy, atap aitqanda, bilim berý mekemeleriniń jelisi boiynsha ózara bailanystardy damytý baǵytynda belsendi jumys júrgizildi.
«Jalpy, Qazaqstannyń 2022 jyly Táýelsiz Memleketter Dostastyǵyna tóraǵalyq etýiniń barlyq josparlanǵan is-sharalary tolyq kólemde oryndaldy», — dep túiindedi Álihan Smaiylov.
Otyrysqa qatysýshylar 2023 jyly Belarýs Respýblikasynda II TMD elderiniń oiyndaryn ótkizý jáne Qoǵamdyq densaýlyq saqtaý salasyndaǵy sanitarlyq-epidemiologiialyq sipattaǵy tótenshe jaǵdailar týraly eskertý jáne olarǵa den qoiý jónindegi yntymaqtastyq týraly kelisimdi qabyldaý máselelerin talqylady.
Shara qorytyndysy boiynsha delegatsiia basshylary birqatar qujattarǵa qol qoiyldy.
