QR Premer-Ministri Álihan Smaiylov el turǵyndaryn qazaqstandyq ónimmen qamtýdyń mańyzdylyǵyna toqtaldy, dep habarlaidy QazAqparat.
«Ónerkásiptik saiasat týraly qabyldanǵan zań sheńberinde jergilikti qamtýdy damytý maqsatynda qundylyqty damytý týraly baǵdarlama ázirleý kerek. Biz otandyq ónim men taýarlardy satyp alýdy qamtamasyz etýimiz qajet. Sonymen qatar jumys jáne kórsetiletin qyzmetterdi paidalaný boiynsha da otandyqtardy qoldaý kerek. Ásirese, offteik kelisimsharttarǵa qol jetkizý boiynsha múmkindikter bere otyryp, iri kásiporyndardyń ainalasynda shaǵyn jáne orta biznestiń damýyna yqpal etý mańyzdy», - dedi Álihan Smaiylov elordada ótip jatqan «Atameken» ulttyq kásipkerler palatasynyń kezekten tys IH sezinde.
Premer-Ministrdiń aitýynsha, pandemiia, álemdik ekonomikalyq daǵdarys jáne qańtar oqiǵasy el ekonomikasy úshin jańa synaq.
«Memleket basshysy óz sózinde birqatar mańyzdy áleýmettik-ekonomikalyq mindetterdi júieli túrde sheshý jóninde naqty tapsyrmalar berdi. Bul eń aldymen, makroekonomikalyq turaqtylyqty qamtamasyz etý, azamattarymyzdyń ál-aýqaty men ómir súrý deńgeiin arttyrý. Sondai-aq, ekonomikalyq igilikterdi ádil bólý úshin ekonomikany ártaraptandyrý jáne monopoliiasyzdandyrý saiasatyn júrgizý», - deidi Úkimet basshysy.
