Premer-Ministrdiń birinshi orynbasary – Qarjy ministri Álihan Smaiylov Qazaqstan ekonomikasyna koronavirýs saldarynyń teris áserine qatysty pikir bildirdi, dep habarlaidy "Ult aqparat".
«Qazirgi kezde koronavirýs Qazaqstanǵa zalalyn tigizbes úshin tiisti sharalardy qabyldap jatyrmyz. Eger de bizdiń qadamdar tabysty bolsa, sondai-aq osy problemalardan qutylsaq, onda ekonomikaǵa salmaq túspeidi. Degenmen de kórshi eldermen aradaǵy qarym-qatynastar turǵysynda radikaldy sharalardy qabyldaýǵa májbúr bolsaq (Qytaimen qatynastar boiynsha), bul qadamdardyń belgili bir deńgeide áseri baiqalýy yqtimal», - dedi Smaiylov Parlament Májilisinde tilshiler saýalyna jaýap bere otyryp.
Sonymen qatar ol virýsqa bailanysty týrizm salasynda tiisti deńgeide shekteýler oryn alǵanyn eske saldy.
«Belgili bir dárejede týristik saparlar shektelgen, osy oraida atalǵan elge saparǵa barýdan ýaqytsha bas tartýǵa keńes berdik. Meniń oiymsha, bul virýsty juqtyryp alý qaýpinen saq bolý úshin bizdiń azamattar osy keńesimizge nazar aýdaratyn bolady. Qytaidaǵy týrizmnen tartylǵan tabys osy eldiń ekonomikasyna túsedi. Eger bizdiń azamat onda barmasa, aqsha elimizde qalady. Kerisinshe, bul úrdis Qazaqstan úshin jaqsy», - dedi ol.
Budan buryn habarlanǵandai, búgin Májiliste Á. Smaiylov el aýmaǵynda koronavirýstyń taralýyna jol bermeýge bólingen qarjy týraly aityp berdi.
