Qaraǵandy oblysyna jumys saparymen barǵan QR Premer-Ministri Álihan Smaiylov óńirdiń keshendi áleýmettik-ekonomikalyq damýy jóninde keńes ótkizdi, dep habarlaidy "Ult aqparat" primeminister.kz portalyna silteme jasap.
Keńeste oblys ákimi Jeńis Qasymbek, indýstriia jáne infraqurylymdyq damý ministri Qaiyrbek Óskenbaev, ekologiia, geologiia jáne tabiǵi resýrstar ministri Serikqali Brekeshev, tsifrlyq damý, innovatsiialar jáne aeroǵarysh ónerkásibi ministri Baǵdat Mýsin, eńbek jáne halyqty áleýmettik qorǵaý birinshi vitse-ministri Aqmadi Sarbasov, oqý-aǵartý birinshi vitse-ministri Sholpan Karinova baiandama jasady.
Premer-Ministr sońǵy ýaqytta Qaraǵandy oblysynda órt jáne sýdaǵy jazataiym oqiǵalarmen, sondai-aq kásiporyndardaǵy oqiǵalarmen bailanysty tótenshe jaǵdailar jiilep ketkenin atap ótti.
«Tótenshe jaǵdailar ministrligi oblys ákimdigimen birlesip, óńirdegi qaýipsizdiktiń tiisti deńgeiin qamtamasyz etý boiynsha barlyq qajetti sharalardy qabyldasyn», — dep tapsyrdy Álihan Smaiylov.
Úkimet basshysy 2022 jyly Qaraǵandy oblysyn damytýǵa 176 mlrd teńgeden astam qarajat qarastyrylǵanyn eske saldy. Sonymen qatar respýblikalyq biýdjetti naqtylaý aiasynda óńirge qosymsha 48 mlrd teńgeden astam qarajat bólingen.
«Bul shyǵystar injenerlik infraqurylymdy jáne infraqurylymdyq jobalardy damytýǵa, agroónerkásiptik keshendi qoldaýǵa jáne óńirdiń áleýmettik qajettilikterine baǵyttalǵan. Ákimdik sapaly nátijege qol jetkizýdi, osy qarajattyń maqsatty paidalanylýy men tiimdi igerilýin qamtamasyz etýi qajet», — dedi Premer-Ministr.
Sonymen qatar Álihan Smaiylov azyq-túlik baǵasynyń negizsiz ósýine jol bermeý boiynsha josparly jumys júrgizý qajettigin eske saldy.
Osyǵan bailanysty Úkimet basshysy ústeme baǵalardy baqylaýdy kúsheitýdi jáne «ainalym shemasyn», ońtústik óńirler men taiaý shetel fermerlerimen tikelei sharttardy, sondai-aq aýyl sharýashylyǵy ónimderin jetkizýge forvardtyq kelisimsharttardy qosa alǵanda, qoljetimdi naryqtyq tetikterdi belsendi qoldanýdy tapsyrdy.
Premer-Ministr óńir ekonomikasyn ártaraptandyrýdyń eń ózekti másele ekenin atap ótti.
Osy maqsatta biyl jeke investitsiialar esebinen 222 mlrd teńgege jýyq somaǵa 12 jobany aiaqtaý josparlanyp otyr. Sondai-aq 874 mlrd teńgeden astam somaǵa taǵy 34 joba pysyqtalyp jatyr.
«Bul jobalar agroónerkásip kesheni, mashina jasaý, metallýrgiia, energetika, qurylys indýstriiasy jáne qaǵaz ónerkásibi siiaqty salalarda iske asyrylady. Oblys ákimdigi barlyq jobalardy merziminde iske qosyp, sapaly júzege asýyn qamtamasyz etýi qajet», — dedi Álihan Smaiylov.
Keńes qorytyndysy boiynsha Premer-Ministr memlekettik organdar men ákimdikke taǵy da birqatar tapsyrma berdi. Atap aitqanda, joldardyń normativtik jaǵdaiyn jaqsartý, Jezqazǵan-Qaraǵandy avtojolynyń ýchaskesin rekonstrýktsiialaý boiynsha JSQ ázirleýdi aiaqtap, qurylys-montajdaý jumystaryn kezeń-kezeńimen bastaý, sondai-aq Qaraǵandy qalasynyń turǵyn úi alaptaryn jylýmen jabdyqtaýdyń magistraldyq jelilerin salý jobasyn aiaqtaý boiynsha usynystar engizý kerek.
Eńbek jáne halyqty áleýmettik qorǵaý ministrligine «Atameken» palatasymen jáne Kásipodaqtar federatsiiasymen birlesip, aralas jaýapkershilikti qoldaný kezinde qyzmetkerdiń kinásiniń eń joǵary shegin belgileý boiynsha biryńǵai ustanymdy ázirleý jáne jazataiym oqiǵalar jónindegi zańnamany jetildirý boiynsha tásilderdi ázirleý tapsyryldy.
Qaraǵandy oblysynyń ákimdigine Oqý-aǵartý ministrligimen birlesip, 2022 jyldyń sońyna deiin mektepke deiingi bilim berýge memlekettik tapsyrysty ornalastyra otyryp, 14 balabaqshany paidalanýǵa berýdi qamtamasyz etý tapsyryldy.
«Biz kúsh biriktire otyryp, Qaraǵandy oblysynyń damýyna atsalysýymyz kerek. Halyqtyń ál-aýqatynyń artýy, ómir súrý sapasynyń jaqsarýy osyǵan tikelei bailanysty», — dedi Álihan Smaiylov.
Premer-Ministr Qaraǵandyda túrli baǵyttaǵy digital-mamandardy oqytatyn «Terrikonovaia dolina» IT-Hub-na bardy.
«Búginde memleket IT-kompaniialarǵa kóptegen preferentsiialar usynady jáne biznes-inkýbatsiialaýdyń túrli baǵdarlamalaryn júrgizedi. Bul – elimizde, onyń ishinde jastar arasynda tehnologiialyq kásipkerliktiń ekojúiesin qalyptastyrý boiynsha mańyzdy qadamdar. Osy baǵyttaǵy jumysty barlyq óńirde jeke seriktestermen birlesip jalǵastyrý qajet», — dedi Úkimet basshysy.
