QR Premer-Ministri Álihan Smaiylov Úkimet otyrysynda aldaǵy jyldary qant salasyn damytý jóninde birqatar tapsyrma berdi, dep habarlaidy "Ult aqparat" primeminister.kz saityna silteme jasap.
Aýyl sharýashylyǵy ministriniń mindetin atqarýshy Ábilhaiyr Tamabek Memleket basshysynyń tapsyrmasyna sáikes, Qant salasyn damytýdyń 2026 jylǵa deiingi keshendi jospary ázirlengenin málimdedi. Ol qant qyzylshasynyń egis alańdaryn keńeitý arqyly shikizat bazasyn ulǵaitýdy, jańa sýarmaly jerlerdi iske qosýdy, sýarýdyń sý únemdeý tehnologiialaryn engizýdi, tuqym sharýashylyǵyn damytýdy, qant qyzylshasyn qaita óńdeý boiynsha zaýyttardyń qýattylyǵyn tehnikalyq jáne tehnologiialyq qaita jaraqtandyrýdy, sondai-aq jańa innovatsiialyq zaýyt salýdy kózdeidi.
Jospardy iske asyrý 2026 jylǵa qarai qant importynyń úlesin 58-den 17%-ǵa deiin azaitýǵa múmkindik bermek.
Bul másele boiynsha Jetisý oblysynyń ákimi Beibit Isabaev pen Pavlodar oblysynyń ákimi Ábilqaiyr Sqaqov ta baiandama jasady.
Talqylaýdy qorytyndylai kele, Álihan Smaiylov azyq-túlik qaýipsizdigin qamtamasyz etý men naryqty otandyq ónimdermen tolyqtyrý Úkimettiń strategiialyq mindeti ekenin atap ótti.
«Qalyptasqan jaǵdai keibir taýarlyq pozitsiialar boiynsha, ásirese qant naryǵynda problemalardyń bar ekenin kórsetti. Biz qant tapshylyǵy men onyń qymbattaýyna qatysty halyqtyń narazylyǵyn kórip otyrmyz. Bul jóninde Memleket basshysy tarapynan da ádil syn aityldy. Osyǵan bailanysty atalǵan salany damytý boiynsha keshendi jospar ázirlendi», — dedi Premer-Ministr.
Álihan Smaiylov birinshi kezekte qant zaýyttaryn otandyq shikizatpen qamtamasyz etý mindeti turǵanyn aitty. Ol úshin egis alqaptaryn 11,5 myńnan 38 myń gektarǵa deiin, iaǵni 3 ese arttyrý josparlanyp otyr.
«Bul aldaǵy bes jylda otandyq shikizattan qant óndirý kólemin jyl saiyn 250 myń tonnaǵa deiin jetkizýge múmkindik beredi», — dedi Úkimet basshysy.
Premer-Ministrdiń aitýynsha, qant zaýyttaryn barynsha jańǵyrtyp, olardyń óndiristik qýatyn arttyrý qajet.
«Jalpy qantpen qamtamasyz etý jaǵdaiy turaqtaldy. Qanttyń qajetti qory bar. Dúrligýge jol bermeý úshin qant baǵasyna qatysty túrli manipýliatsiialardyń aldyn alyp, alypsatarlyq áreketter men qajetsiz deldaldardy anyqtaý qajet», — dedi Álihan Smaiylov.
Sóz sońynda Premer-Ministr Aýyl sharýashylyǵy ministrligine Saýda jáne integratsiia ministrligimen jáne óńir ákimdikterimen birlesip, qant salasyn damytý boiynsha keshendi jospardy tolyq kólemde oryndaýdy tapsyrdy.
Sondai-aq, Aýyl sharýashylyǵy ministrligine Saýda jáne integratsiia ministrligimen jáne «Báiterek» holdingimen birlesip, qant zaýyttaryn jańǵyrtý jáne shikizat satyp alýǵa ainalym qarajatyn tolyqtyrý úshin jeńildikpen kredit berý máselesin pysyqtaý tapsyryldy.
Odan bólek, Aýyl sharýashylyǵy ministrligine Pavlodar oblysynyń ákimdigimen, «Báiterek» holdingimen birlesip, óńirde qant qyzylshasy óndirisiniń kólemin keńeitý sharalaryn qabyldap, Pavlodar oblysynda jańa qant zaýytyn salý máselesin pysyqtaý tapsyryldy.
Al, Saýda jáne integratsiia ministrligine ishki naryqty dempingten qorǵaý úshin qantqa eń tómengi bólshek saýda baǵasyn belgileý máselesin pysyqtaý tapsyryldy.
