QR Premer-Ministri Álihan Smaiylov densaýlyq saqtaý júiesiniń tiimdiligin arttyrý máseleleri jóninde keńes ótkizdi, dep habarlaidy "Ult aqparat" Úkimettiń resmi saityna silteme jasap.
Úkimet basshysy Densaýlyq saqtaý ministrligindegi jáne Áleýmettik meditsinalyq saqtandyrý qoryndaǵy (ÁMSQ) qarajattyń tiimdiligin baqylaýdy úilestirý jáne baǵalaý júiesin synǵa aldy.
2021 jyly densaýlyq saqtaý salasyna jumsalǵan memlekettik shyǵystar 2,3 trln teńgeni nemese JIÓ-niń 2,9%-yn qurady. Bul rette densaýlyq saqtaýǵa arnalǵan respýblikalyq biýdjet qarajatynyń 90%-ǵa jýyǵyn ÁMSQ ákimshilendiredi.
Premer-Ministr ÁMSQ-nyń barlyq kórsetkishteri tym jalpylanǵan ekenin jáne halyqtyń meditsinalyq kómekke, sondai-aq olardy qanaǵattandyrý úshin meditsinalyq uiymdarǵa degen naqty qajettiligin aiqyn kórsetpeitinin atap ótti. Osyǵan bailanysty Smaiylov Qor qyzmetin baqylaý men qarajatty tiimdi jumsaý indikatorlarynyń naqty júiesin ázirleýdi tapsyrdy.
«Búginde óńirlerdegi meditsinalyq qyzmetterdiń 100%-y Qordan qarjylandyrylady, bul halyqqa meditsinalyq kómek kórsetýdi uiymdastyrý jaýapkershiliginiń tómendeýine alyp keledi. Bul, ásirese, ótken jyldyń sońynda Almaty jáne Jańaózen qalalarynda jedel meditsinalyq kómek qyzmetin qarjylandyrý jáne uiymdastyrý máseleleri týyndaǵan kezde oryn aldy», — dep Smaiylov, tegin meditsinalyq kómektiń kepildik berilgen kólemin (TMKKK) qarjylandyrýdy kezeń-kezeńimen jergilikti deńgeige bere bastaýdy tapsyrdy.
Úkimet basshysy ÁMSQ memlekettik qarajatty ákimshilendirýdi birtindep toqtatyp, saqtandyrý meditsinasyn damytý máselelerine jáne qarjylandyrýdyń qosymsha kózderin izdeýge basa kóńil bólýi qajet ekenin atap ótti.
Premer-Ministr az ýaqyt ishinde densaýlyq saqtaý infraqurylymyna táýelsiz keshendi tehnikalyq aýdit jáne túgendeý júrgizýdi, onyń ishinde jabdyqtarmen jáne meditsinalyq-tehnologiialyq júielermen jaraqtandyrýdy, ana men bala, onkologiia, travmatologiia, kardio-, neirohirýrgiia, infektsiialyq aýrýlar siiaqty basym baǵyttar boiynsha óńirlerdiń meditsinalyq infraqurylymyn damytý kartasyn ázirleýdi tapsyrdy.
Álihan Smaiylov meditsinalyq personaldy diplomnan keiingi oqytý baǵdarlamasyn ázirlep, densaýlyq saqtaý júiesin zamanaýi jabdyqta jumys istei alatyn jáne jańa tehnologiialardy igere alatyn kadrlarmen qamtamasyz etý qajettigin atap ótti.
Úkimet basshysy Densaýlyq saqtaý ministrligine ýákiletti organdarmen birlesip, az ýaqyt ishinde salany basqarý, investitsiialyq josparlaý, qarjylandyrý jáne biýdjetaralyq qatynastar júiesin jetildirý boiynsha sharalar qabyldaýdy tapsyrdy.
«Basty mindet – tiimdi densaýlyq saqtaý júiesin qalyptastyrý. Barlyq usynystar ázirlenip jatqan jáne jýyq arada bekitiletin Úkimettiń 2022 jylǵa arnalǵan is-qimyl josparyna engizilýi tiis», — dedi Premer-ministr.
