Álihan Smaiylov «ArselorMittal Temirtaýdy» óndiristegi apattardy azaitý boiynsha pármendi sharalar qabyldaýǵa shaqyrdy, dep habarlaidy "Ult aqparat" primeminister.kz saityna silteme jasap.
Qaraǵandy oblysyna jumys sapary kezinde QR Premer-Ministri Álihan Smaiylov Temirtaý qalasynyń ónerkásip jáne áleýmettik nysandaryn aralady.
Úkimet basshysy «ArselorMittal Temirtaý» AQ-nyń 3-domna peshiniń jumysymen tanysty, sondai-aq oblys jáne kásiporyn basshylyǵymen ónerkásip qaýipsizdigin qamtamasyz etý máselelerin talqylady.
Álihan Smaiylov metallýrgiia qaýiptiligi asa joǵary óndiris salasy ekenin atap ótti. Bul rette «ArselorMittal Temirtaýda» atalǵan problema ótkir bolyp tur, al kásiporynda júrgizilip jatqan qaýipsiz eńbek jaǵdailaryn qamtamasyz etý sharalary jaǵdaidy túbegeili jaqsartýǵa múmkindik berip otyrǵan joq.
Úkimet basshysynyń pikirinshe, tehnologiialyq protsesterdi jańǵyrtýǵa, onyń ishinde moraldyq turǵyda ábden tozyǵy jetken jabdyqtardy jańartýǵa bólingen investitsiialar jetkiliksiz. Bul – óndiristegi apattyq jaǵdailardyń týyndaýyna ákeletin basty sebepterdiń biri.
«Jyl saiyn óndiriste 10-12 adam mert bolady. Biz bul jaǵdaiǵa kóne almaimyz. Jabdyqtardyń ábden tozyǵy jetken, jańǵyrtýǵa salynatyn investitsiialar deńgeii basqa kásiporyndarmen salystyrǵanda 2-3 ese tómen. Muny túzetý kerek. Investitsiia kólemin kezeń-kezeńmen arttyryp, eń aldymen, qyzmetkerlerdiń qaýipsizdigin qamtamasyz etý kerek», — dedi Smaiylov kompaniia basshylyǵyna.
Sonymen qatar Premer-Ministr ekologiialyq qaýipsizdikti qamtamasyz etý máselelerine nazar aýdardy.
«Kún tárbindegi ekologiialyq máseleler ótkir tur. Memleket basshysy bizdiń aldymyzǵa tiisti mindetter qoiyp otyr. Sondyqtan bul másele boiynsha birlesip jumys isteýimiz kerek», — dedi ol.
Osyǵan bailanysty Úkimet basshysy kásiporyn basshylyǵyn óndiristegi jazataiym oqiǵalardyń aldyn alý jáne ekologiialyq mindettemelerdi saqtaý boiynsha pármendi sharalar ázirleýge shaqyrdy.
Budan keiin Álihan Smaiylov «Linde Gaz Qazaqstan» JShS ónerkásiptik gaz óndirý zaýytynyń qyzmetimen tanysty. Zaýyt Memleket basshysynyń Germaniiaǵa sapary kezinde Yntymaqtastyq týraly memorandýmǵa qol qoiylǵannan keiin iske qosylǵan.
«Bul oraida eki el arasyndaǵy ýaǵdalastyqtar tabysty iske asyrylyp jatqanyn kórýge bolady. Bul bizdiń elge investitsiia salýdy qarastyratyn basqa sheteldik kompaniialar úshin jaqsy yntalandyrý bolmaq», — dedi Premer-Ministr.
Álihan Smaiylov kompaniianyń kómirqyshqyl gazy shyǵaryndylaryn azaitý jónindegi sheshimderi elimizdiń basqa óńirlerindegi metallýrgiia jáne himiia zaýyttarynda, munai-gaz jáne energetika salalarynyń kásiporyndarynda sátti qoldanylýy múmkin ekenin aitty.
Sondai-aq Úkimet basshysy Temirtaýda balalardy tárbieleý men damytýdyń jaqsartylǵan baǵdarlamasyn iske asyratyn «Jas talanttar akademiiasy» balabaqshasyna bardy.
Biyl respýblika boiynsha 322 jańa balabaqshany iske qosý josparlanǵan, onyń ishinde 14 balabaqsha Qaraǵandy oblysynda ornalasqan.
Premer-Ministr árbir balaǵa mektepke deiingi sapaly bilim berip, tárbieleý úshin memlekettik-jekeshelik áriptestikti damytý jáne biznesti yntalandyrý boiynsha júieli jumys jalǵasatynyn atap ótti.
