Foto: primeminister.kz
QR Premer-Ministri Álihan Smaiylovtyń tóraǵalyǵymen ótken ortalyq memlekettik organdar, Almaty qalasy jáne Almaty oblysy ákimdikteri, Bas prokýratýra, BQDA, QMA jáne basqa da vedomstvolar basshylary qatysqan keńeste respýblikadaǵy iri saýda orny – «Altyn Orda» bazary jumysynyń ózekti máseleleri qaraldy, dep habarlaidy "Ult aqparat" primeminister.kz saityna silteme jasap.
Bazarda 5 myńnan astam saýda orny bar, oǵan kúnine shamamen 50 myńdai satyp alýshy keledi. Bazar Almaty qalasy men Almaty oblysyndaǵy kókónis, et ónimderi men jemisterdiń kóterme saýdasynyń 40%-yn jáne bólshek saýdasynyń 70%-yna deiin qamtidy. Oǵan taýardy negizgi jetkizýshiler - otandyq óndirýshilermen qatar kórshiles elderdiń kompaniialary.
Sonymen qatar kúndelikti ónimniń úlken aǵynyn eskere otyryp, bazarda aimaqtyq aýqymda baqylanbaityn oligopoliia qurylady. Bas prokýratýra jáne memlekettik organdarmen tekserý nátijesinde sanitariialyq, veterinariialyq, ekologiialyq, sý, eńbek, sáýlet-qurylys, órtke qarsy, salyqtyq baqylaý, sondai-aq básekelestikti qorǵaý salasynda 300-den astam QR zańnamasy normalaryn buzýshylyqtar anyqtaldy.
Almaty oblysy ákimdiginiń derekteri boiynsha anyqtalǵan zań buzýshylyqtar ishinara joiyldy. Sonymen qatar kásipkerler tarapynan biznes júrgizýge qolaisyz jaǵdailar týraly shaǵymdar sany artqan, bul saiyp kelgende taýarlar baǵasynyń negizsiz ósýine alyp keledi.
Keńes qorytyndysy boiynsha Premer-Ministr qoldanystaǵy zańnamaǵa sáikes sharalar qabyldaý qajettigin atap ótti. Atap aitqanda, «Altyn Orda» bazarynyń qyzmetin retke keltirý jáne baǵany qalyptastyrýda ashyqtyqty qamtamasyz etý maqsatynda qoǵamdyq baqylaýdy uiymdastyrý, sondai-aq onyń aýmaǵynda barlyq zań buzýshylyqtar tolyǵymen joiylǵanǵa deiin prokýratýra, ishki ister organdary, BQDA, QMA jáne basqa da ýákiletti memlekettik organdar qyzmetkerlerinen quralǵan turaqty mobildik top qurý tapsyryldy.
Sonymen qatar Almaty aglomeratsiiasynda saýda aǵyndaryn teńestiretin jáne «Altyn Orda» bazarynyń baǵa saiasatyna yqpalyn azaitatyn balamaly kóterme-saýda ortalyqtaryn qurý boiynsha jumys jalǵasady.
