Premer-ministr áleýmettik mańyzy bar taýarlarǵa 15 paiyz ústeme baǵanyń saqtalýyn baqylaýdy kúsheitýdi tapsyrdy, - dep habarlaidy "Ult aqparat" primeminister.kz saityna silteme jasap.
19 naýryzda premer-ministr Álihan Smaiylovtyń tóraǵalyǵymen Memleket basshysynyń tapsyrmalaryn jáne Qazaqstan Respýblikasyndaǵy áleýmettik-ekonomikalyq jaǵdaidy turaqtandyrý jónindegi jedel is-qimyl josparyn oryndaý boiynsha kezekti keńes ótti.
Jyl basynan beri Qazaqstanda áleýmettik mańyzy bar azyq-túlik taýarlarynyń baǵasy 8 paiyzǵa ósti. Baǵanyń ósýi barlyq óńirde tirkeldi. Óńirler boiynsha ótken aptada baǵa eń joǵary ósken Batys Qazaqstan oblysynda - 9,5 paiyzǵa, Aqtóbe oblysynda - 8,7 paiyzǵa, Pavlodar oblysynda - 7,1 paiyzǵa jáne Atyraý oblysynda - 6,7 paiyzǵa.
QR premer-ministri Álihan Smaiylov áleýmettik mańyzy bar azyq-túlik ónimderi baǵasynyń aitarlyqtai ósýine jol bergen birqatar óńir ákimderine eskertý jasady.
"Oblysta jyl basynan beri de, bir apta ishinde de barlyq ÁMAT boiynsha baǵanyń ósýine jol berilgen, - dedi Álihan Smaiylov BQO ákimine. - Bul halyqqa edáýir qiyn. Biz Oraldaǵy kóptegen dúkendi araladyq. Qant baǵasy bir jerde tómen, al bir jerde joǵary. Men adamdardy elimizdiń barlyq óńirine arnaiy joldadym. Keibir saýda oryndarynda baǵa 20 paiyzǵa kóterilgen. Ústeme baǵany baqylaý kerek, ony eshkim qadaǵalamai otyr".
Premer-ministr qant baǵasynyń ósýiniń mysalynda óńirde ÁMAT baǵasyna baqylaý, bólshek saýda marjasynyń 15 paiyzdan asyp ketýine jol bermeý monitoringi júrgizilmeitinin aitty.
Sondai-aq, Aqtóbe oblysynyń ákimine eskertý jasaldy, onda el boiynsha baǵanyń eń joǵary ósý kórsetkishteri tirkeldi: kartop boiynsha 32,8 paiyz, sábiz boiynsha 38,3 paiyz. premer-ministrdiń aitýynsha, ótken aptada Qazaqstan Respýblikasynda jedel reid sharalaryn ótkizý kezinde áleýmettik mańyzy bar taýarlar baǵasyn negizsiz kóterý faktisi boiynsha 5 myń buzýshylyq anyqtaldy.
"Jalpy buzýshylyqtar bar, - dedi Álihan Smaiylov. - Eger kóterme baǵa qymbattasa, onda másele basqa. Biraq kóterme baǵa ózgermese jáne marja 2 ese nemese odan da kóp kóterilse, onda biz baǵanyń negizsiz óskenin baiqaimyz. Buǵan jol berýge bolmaidy".
Memleket basshysynyń tapsyrmalaryn oryndaý maqsatynda azyq-túliktiń tapshylyǵy men baqylaýsyz qymbattaýyn boldyrmaý úshin Qazaqstan Respýblikasynda azyq-túlikti turaqtandyrý qorlaryn qalyptastyrý júrgizilip jatyr.
2022 jylǵy 17 naýryzdaǵy jaǵdai boiynsha saýda obektileriniń, óndiristik kásiporyndardyń, qoimalardyń qýatyn, turaqtandyrý qorlaryn qosa alǵanda, ÁMAT respýblikalyq qorlary: 421 992 tonna kartop, 70 876 tonna sábiz, 103 490 tonna piiaz, 42 860 tonna qyryqqabat, 11 832 tonna qaraqumyq jarmasy, 29 165 tonna kúnbaǵys maiy, 28 005 tonna qant jáne basqa da ónimder.
Ótken aptada monopoliiaǵa qarsy den qoiý sharalary sheńberinde Qazaqstan Respýblikasynda baǵanyń negizsiz ósýine jol bermeý, sondai-aq saýda ústemesin 15 paiyzdan 10 paiyzǵa deiin tómendetý týraly 9 shart jasaldy. Atap aitqanda, Nur-Sultan qalasynda un óndirýshimen, Qaraǵandy oblysynda saýda jelilerimen, Qostanai oblysynda qant pen qaraqumyq kóterme jetkizýshilerimen, Atyraý oblysynda sút ónimderi men taýyq jumyrtqalaryn óndirýshilermen, Batys Qazaqstan oblysynda taýyq jumyrtqalaryn óndirýshimen sharttar jasaldy.
Zańbuzýshylyq derekteri boiynsha ótken aptada 8 tergeý bastaldy. Qostanai oblysynda taýyq etin kóterme jetkizýshisi "Opt Torg Company Plus" kompaniiasy boiynsha; Qaraǵandy, Aqmola, Pavlodar, Soltústik Qazaqstan oblystarynda taýyq jumyrtqasyn óndirýshiler boiynsha "Qaraǵandy Qus" JShS, "Qurma agrofirmasy" JShS, "Úshtóbe Qus" JShS, "Ijevskii" JShS, "Pavlodar Qus" JShS, "Sharbaqty Qus" JShS, "Alekri" JShS, "Adel Qus" JShS; Mańǵystaý oblysynda "QazAzot" AQ ammiak selitrasyn óndirýshi boiynsha; Almatyda "QazFosfat" JShS ammofos óndirýshi boiynsha; Aqtóbe oblysynda "KAIS invest" JShS jáne "Firma As-An" JShS kóterme jetkizýshileri boiynsha tergeý bastaldy.
Keńes qorytyndysy boiynsha premer-ministr Saýda komitetine kezekti keńeste óńirlerde bekitilgen bólshek saýda ústemesin saqtaý monitoringi boiynsha atqarylǵan jumys qorytyndysy jáne buzýshylyqtardyń negizgi sebepteri týraly baiandaýdy tapsyrdy.
Óńirlerdiń basshylaryna áleýmettik mańyzy bar taýarlar baǵasyndaǵy eń joǵary ruqsat etilgen ústeme aqyǵa monitoring júrgizý boiynsha baqylaý is-sharalaryn kúsheitý jáne tiisti sharalar qabyldai otyryp, baǵa belgileýdiń barlyq tizbegi boiynsha deldaldyq shemalardy tekserý jónindegi óńirlik komissiialardyń jumysyn jalǵastyrý tapsyryldy.
Sonymen qatar, premer-ministr óńirlerdiń basshylaryna boljamdy qajettilikterdi qamtamasyz etý úshin erte pisetin kókónisterdi otandyq óndirýshilermen aldyn-ala kelisim jasasýdy usyndy.
