Ýkrainanyń Qazaqstandaǵy elshisi Petr Vrýblevskii qazaqstandyqtardyń sezimine nuqsan keltiretin málimdemelerden keiin jaǵymsyz mártebege ie boldy. Ýkraina jańa elshi taǵaiyndaidy. Bul týraly QR SIM resmi ókili Aibek Smadiiarov málimdedi, - dep habarlaidy Massaget.kz.
"Resei SIM ókili Zaharovanyń ýkrainalyq elshini Qazaqstannan shyǵarýǵa qatysty pikirine bailanysty onyń málimdemesiniń máneri Qazaqstan men Reseidiń teń quqyly strategiialyq seriktester retindegi odaqtastyq qatynastarynyń sipatyna sáikes kelmeitinin atap ótkim keledi. Ózderińiz biletindei, Qazaqstan SIM Vrýblevskiidiń arandatýshylyq piǵylyna qatysty ustanymyn jurtshylyqqa jetkizdi. Sondai-aq, Ýkraina tarapyna Petr Vrýblevskiidiń qazaqstandyqtardyń, ásirese, etnikalyq orystardyń sezimine nuqsan keltiretin málimdemeleri týraly aityldy. Mundai málimdemelerdiń elshiniń jumysymen sáikes kelmeitini týraly da eskertildi. Ýkrainalyq tarap muny túsinistikpen qabyldady jáne ony qaitaryp alý týraly kelisimge keldi. Qazir Ýkraina SIM-nen Astanadaǵy jańa elshini taǵaiyndaý týraly ótinish tústi. Osy másele boiynsha arada tolyq túsinistik bar ekenin atap ótkim keledi. Ýkraina elshisi bizdiń elimizde jaǵymsyz mártebege ie jáne Qazaqstan SIM-de nemese basqa da memlekettik vedomstvolarda kezdesýler josparlanyp otyrǵan joq", - dedi Syrtqy ister ministrliginiń resmi ókili Aibek Smadiiarov.
Ol Zaharovanyń elshini qylmystyq jaýapkershilikke tartý týraly úndeýine pikir bildirdi.
"Resei SIM ókili qandai qylmystyq jaýapkershilik týraly aityp otyrǵanyn túsine almaimyz, óitkeni Ýkrainanyń Qazaqstandaǵy elshisi Vena konventsiiasyna sáikes diplomatiialyq immýnitetke ie", - dedi ol.
