Soltústik Qazaqstan oblysynyń fermalary mal basyn asyldandyryp jatyr. Biyl óńirge jetkizilýi tiis 4,5 myń bastyń 3,5 myńy sharýalardyń qolyna tigen, dep habarlaidy "Ult aqparat".
Qyzyljar aýdanyndaǵy Novonikolskoe eldi mekenine Germaniiadan golshtin tuqymdy 160 iri qara mal ákelindi. Bul shetelden jetkizilýi tiis túliktiń alǵashqy partiiasy. Sútti siyrǵa fermerler arasynda suranys joǵary. Sol sebepti jergilikti sharýalar da joldyń shalǵailyǵyna qaramastan, ony kóptep ákelip jatyr. «Zenchenko i K» komandittik seriktestigi siyrlardy sútti mal sharýashylyǵyn damytý baǵdarlamasy aiasynda satyp aldy. Bul baǵdarlama uzaq merzimge shaqtalǵan. Maqsaty - sút ónimderiniń importyn almastyrý.
Golshtin siyry táýligine 50-60 litr sút beredi. Tek kútimi jaqsy bolýy qajet. Mamandardyń sózine qaraǵanda, bul tuqym soltústiktiń klimatyna tez jersinedi.
«Qyzyljar aýdany boiynsha jyldyń aiaǵyna deiin shetelden 1300 mal jetkiziledi. Qazir ákelgen siyrlardy 21 kúndik karantinge qoiamyz. Asa qaýipti aýrýlardy aldyn alý úshin osylaisha ýaqytsha oqshaýlaimyz. Ákelingen ár siyr úshin sharýashylyq 337 myń teńgeden sýbsidiia alady. Golshtindi 2008 jyly «Zenchenko i K» komandittik seriktestigi Kanadadan ákele bastaǵan. Bul maldyń ónimdiligi, sút berýi óte joǵary», - deidi Qyzyljar aýdandyq veterinariia bóliminiń basshysy Syrǵabek Baijanov.
Qazir «Zenchenko i K» sharýashylyǵynda 3,5 myńǵa jýyq iri qara mal bar. Olar kúnine 70 tonna sút beredi.Jyl sońyna deiin golshtin tuqymdy taǵy 440 siyr qosylady.
SQO aýyl sharýashylyǵy basqarmasy mamandarynyń málimetinshe, biyl iri qara mal sany 1,7% ulǵaiyp, 367 myńǵa jetti. Onyń 198 myńy - sútti siyr. «Sybaǵa», «Yrys» jáne sútti mal sharýashylyǵyn damytý baǵdarlamalary arqyly aǵymdaǵy jyly óńirge 4,5 myń bas asyl tuqymdy qara mal satyp alynýy tiis bolsa, búginge deiin onyń 3,5 myńy jetkizildi.
