Foto: gov.kz
Petropavl qalalyq soty Soltústik Qazaqstan oblysy boiynsha qylmystyq-atqarý júiesi departamentiniń bastyǵy Ádilet Mustafinovqa qatysty úkim shyǵardy. Bul týraly Sybailas jemqorlyqqa qarsy is-qimyl agenttigi habarlady.
Agenttiktiń Telegram-daǵy resmi arnasynda jariialanǵan aqparat boiynsha, ol deldal arqyly SQO Qylmystyq-atqarý júiesi mekemelerine un jetkizý qyzmetterinde memlekettik satyp alý shartyn jasasýǵa járdemdeskeni úshin kásipkerden 1 mln teńge mólsherinde para alý boiynsha kináli dep tanylǵan.
Sot úkimimen Mustafinov memlekettik qyzmette jáne kvazimemlekettik sektor sýbektilerinde laýazym atqarý quqyǵynan ómir boiyna aiyra otyryp, 30 mln teńge mólsherinde, al para berýshi men deldalǵa tiisinshe 20 mln jáne 10 mln teńge kóleminde aiyppul salyndy.
Úkim zańdy kúshine engen joq.
"Budan basqa, engizilgen usynymnyń nátijeleri boiynsha Ishki ister ministriniń buiryǵymen tiisti vedomstvolyq baqylaýdyń jáne profilaktikalyq jumystyń júrgizilmegeni úshin Qylmystyq-atqarý júiesi komitetiniń basshylyǵy tártiptik jaýaptylyqqa tartyldy. Atap aitqanda, Komitet tóraǵasy, ádilet polkovnigi Jánibekovke sógis, onyń orynbasary ádilet general-maiory Aiýbaevqa, ózdik qaýipsizdik, kadrlyq jumys jáne tyldyq qamtamasyz etý basqarmalarynyń bastyqtaryna qatań sógis jariialandy", - delingen vedomstvo habarlamasynda.
Osy buiryqpen Mustafinov teris sebeptermen ishki ister organdaryndaǵy qyzmetinen bosatylǵan.
