فوتو: gov.kz
پەتروپاۆل قالالىق سوتى سولتٷستٸك قازاقستان وبلىسى بويىنشا قىلمىستىق-اتقارۋ جٷيەسٸ دەپارتامەنتٸنٸڭ باستىعى ەدٸلەت مۇستافينوۆقا قاتىستى ٷكٸم شىعاردى. بۇل تۋرالى سىبايلاس جەمقورلىققا قارسى ٸس-قيمىل اگەنتتٸگٸ حابارلادى.
اگەنتتٸكتٸڭ Telegram-داعى رەسمي ارناسىندا جارييالانعان اقپارات بويىنشا, ول دەلدال ارقىلى سقو قىلمىستىق-اتقارۋ جٷيەسٸ مەكەمەلەرٸنە ۇن جەتكٸزۋ قىزمەتتەرٸندە مەملەكەتتٸك ساتىپ الۋ شارتىن جاساسۋعا جەردەمدەسكەنٸ ٷشٸن كەسٸپكەردەن 1 ملن تەڭگە مٶلشەرٸندە پارا الۋ بويىنشا كٸنەلٸ دەپ تانىلعان.
سوت ٷكٸمٸمەن مۇستافينوۆ مەملەكەتتٸك قىزمەتتە جەنە كۆازيمەملەكەتتٸك سەكتور سۋبەكتٸلەرٸندە لاۋازىم اتقارۋ قۇقىعىنان ٶمٸر بويىنا ايىرا وتىرىپ, 30 ملن تەڭگە مٶلشەرٸندە, ال پارا بەرۋشٸ مەن دەلدالعا تيٸسٸنشە 20 ملن جەنە 10 ملن تەڭگە كٶلەمٸندە ايىپپۇل سالىندى.
ٷكٸم زاڭدى كٷشٸنە ەنگەن جوق.
"بۇدان باسقا, ەنگٸزٸلگەن ۇسىنىمنىڭ نەتيجەلەرٸ بويىنشا ٸشكٸ ٸستەر مينيسترٸنٸڭ بۇيرىعىمەن تيٸستٸ ۆەدومستۆولىق باقىلاۋدىڭ جەنە پروفيلاكتيكالىق جۇمىستىڭ جٷرگٸزٸلمەگەنٸ ٷشٸن قىلمىستىق-اتقارۋ جٷيەسٸ كوميتەتٸنٸڭ باسشىلىعى تەرتٸپتٸك جاۋاپتىلىققا تارتىلدى. اتاپ ايتقاندا, كوميتەت تٶراعاسى, ەدٸلەت پولكوۆنيگٸ جەنٸبەكوۆكە سٶگٸس, ونىڭ ورىنباسارى ەدٸلەت گەنەرال-مايورى ايۋباەۆقا, ٶزدٸك قاۋٸپسٸزدٸك, كادرلىق جۇمىس جەنە تىلدىق قامتاماسىز ەتۋ باسقارمالارىنىڭ باستىقتارىنا قاتاڭ سٶگٸس جارييالاندى", - دەلٸنگەن ۆەدومستۆو حابارلاماسىندا.
وسى بۇيرىقپەن مۇستافينوۆ تەرٸس سەبەپتەرمەن ٸشكٸ ٸستەر ورگاندارىنداعى قىزمەتٸنەن بوساتىلعان.
