Soltústik Qazaqstan oblysynda koronavirýsqa qarsy vaktsinatsiia bastaldy, alǵashqylardyń biri bolyp ekpeni densaýlyq saqtaý basqarmasy basshysynyń orynbasary Nurlan Aimanov aldy, dep habarlaidy QazAqparat.
SQO densaýlyq saqtaý basqarmasy basshysynyń orynbasary Nurlan Aimanov koronavirýsqa qarsy vaktsina alyp, áserimen bólisti.
«Vaktsina alǵannan keiingi jaǵdaiym jaman emes, ózimdi jaqsy sezinip otyrmyn. Sońǵy ret shamamen 10 jyl buryn ekpe alǵan ekenmin, sol sebepti qobaljý bar. Ine piskende aýyrmaidy, saýsaqtan qan alǵanmen birdei, sol sebepti qorqýdyń qajeti joq.
Medpersonal barlyq talaptardy oryndap, óz mindetterin saýatty oryndap jatyr. Qazir 30 minýttan keiin qaita tekserilemin», - dedi Nurlan Aimanov.
Dárigerdiń aitýynsha, qazirgi tańda vaktsinatsiia - koronavirýspen kúrestiń, ári qarai taralmaýynyń tiimdi joly ekenin álem moiyndap otyr.
«Halyqty kóbirek vaktsinatsiialaý arqyly biz tizbekti územiz. Osylaisha syrqattanǵandar sanyn azaityp, burynǵy tynysh ómirimizge qaita oralamyz.
Keshe túngi saǵat 03.00 shamasynda 1200 doza – birinshi komponenti jetkizildi. Onyń barlyǵy negizinen meditsinalyq qyzmetkerlerge egiledi. Búgin túske deiin meditsinalyq mekemelerge bólip berdik. Vaktsina 13 aýdanda jáne Petropavl boiynsha 4 pýnktte – barlyǵy 17 jerde egiledi. Ázirge kúndelikti qansha adamǵa ekpe jasalatyndyǵyn aitý erterek. Alaida bir ekpe egý kabinetinde medqyzmetkerler eń kóp degende 60 adamdy qamtityn bolady», - dedi SQO densaýlyq saqtaý basqarmasy basshysynyń orynbasary Nurlan Aimanov.
