Soltústik Qazaqstan oblysynda ekologtar jergilikti bilik ókilderimen birge paidalanylǵan ýran kenishterin aralap, qaýipti nysandardyń qazirgi jaǵdaiymen tanysty, dep habarlaidy "Ult aqparat".
SQO ekologiia departamenti baspasóz qyzmetiniń málimetinshe, óńirde qoldanystan shyqqan 6 ýran kenishi bar. Olardyń barlyǵynda ótken ǵasyrdyń toqsanynshy jyldary jumys toqtady. Alaida, ýran óndirilmegenimen turǵyndarǵa keler qaýip áli de zor. Kenishterdiń aýmaǵynda aýzy ashyq qudyqtar bar, sondai-aq munda radiatsiia mólsheri shamadan tys kóp. Qorshalyp, kúzetilýi tiis nysandar ashyq-shashyq jatyr. Aýyldyqtar qorshaýlaryn buzyp áketken.
Osyndai máselelerdi el boiynsha sheshý maqsatynda QR Premer-ministriniń tapsyrmasymen 2018 jyly is-sharalar jospary qabyldandy.
«Paidalanylǵan kenishterge bógde adamdardyń kirýin boldyrmaý maqsatynda 11 tarmaqtan turatyn is-sharalar jospary bekitilgen. Ǵabit Músirepov aýdanynda onyń tórteýi, Aiyrtaý aýdanynda toǵyzy oryndalmaǵan. Eń aldymen qorshap, eskertý belgilerin qoiý qajet. Bul kenishter iesiz qalǵannan keiin talan-tarajǵa tústi», - deidi SQO ekologiia departamentiniń basshysy Erbolat Omarov.
Grachevskii ken orny 1965 jyly ashylǵan. Onyń aýmaǵynda 14 ǵimarat, sonyń ishinde jaqyn mańdaǵy eldimekenderdi jylýmen qamtyǵan qazandyǵy bolǵan. 1998 jyly kenishtiń jumysy toqtatyldy, alaida, birjolata jabylǵan joq.
Ekologtardyń aitýynsha, osydan 5 jyl buryn Grachevskii ken ornyndaǵy shahtalyq qudyqtarda radiatsiia tiisti mólsherden 5 ese artyq bolǵan. Bul joly kenishte de, sanitarlyq-qorǵanys aimaǵynda da onyń deńgeii qalypty mólsherden aspady.
Aiyrtaý aýdandyq ákimdigi ken ornyn kommýnaldyq menshikke ótkizbek.
«Jobalyq-smetalyq qujatty ázirleý úshin qomaqty soma qajet. Másele qorshaýda ǵana emes. Bul jerde 14 nysan. Onyń barlyǵyn qalai jabamyz. Memlekettik akti men tehqujatty ázirleýge 3 mln teńge qajet. Qorshaýdy da qoiarmyz. Biraq keiin ony kúzetip, talapqa sai ustaý kerek qoi», - deidi Aiyrtaý aýdany ákiminiń orynbasary Edres Janapin.
Tekseris júrgizgen ekologtar eki aýdannyń ákimdigine is-sharalar josparyn jyl sońyna deiin tolyq oryndaýǵa ýaqyt berdi.
