Soltústik Qazaqstan oblysy Jeliakovo eldi mekeninde bolǵan órtte 6 turǵyn úi men qora-qopsylardan bólek, maly, úi qustary da janyp ketti, dep habarlaidy "Ult aqparat".
SQO Tótenshe jaǵdailar departamentinde ótken brifingide Qyzyljar aýdany Jeliakovo eldi mekeninde bolǵan órtke qatysty mamandar aqparat berdi.
«Turǵyndardan surastyrý kezinde 8,5 mln teńgeniń shyǵyny keltirilgeni anyqtaldy. Órt kezinde bir iri qara mal, 4 torai, 40 taýyq pen 4 qaz qyryldy. Órt shalǵan aýmaq – 950 sharshy metr. Úsh turǵyn úi jáne 3 bos turǵan úi, eki qora-qopsy órtendi. Bizge bastapqyda «eki buzaý janyp ketti» dep aitty. Al keshke qarai turǵyndar maldarynyń tabylǵanyn aityp habarlasty. Sondai-aq keibiriniń áli kúnge itteri tabylmai jatyr. Qashyp ketken eken», - deidi Qyzyljar aýdandyq Tótenshe jaǵdailar boiynsha bólimniń bastyǵy Aslan Ahmetjanov.
Vagýlino aýyldyq okrýginde úilerdiń ortasha baǵasy – 500-700 myń teńge shamasynda. Eki otbasy sol aýyldaǵy bos úilerge kóship kirmek.
«Bireýi sol aýylda bos turǵan úige kóship kirdi. Olar sol úidi shamamen 500 myń teńgege satyp almaq. Ekinshi otbasyǵa ýaqytsha baspana berildi. Olar da sol aýyldan úi satyp alýdy josparlap otyr. Al úshinshisi jalǵyzbasty zeinetker. Ol Aqqaiyń aýdanyndaǵy qarttar úiine baratyn bolyp sheshti», - deidi Aslan Ahmetjanov.
Órtke qatysty Qyzyljar aýdandyq politsiia bólimi «Bótenniń múlkin abaisyzda joiý nemese búldirý» baby boiynsha qylmystyq is qozǵady. Qazir tergeý amaldary júrgizilip jatyr. Órt-tehnikalyq saraptama taǵaiyndalyp, órttiń shyǵý sebebi anyqtalady. Materialdyq shyǵyn kólemi eseptelip, órttiń shyǵýyna sebepker tulǵa izdestiriledi.
Esterińizge sala keteiik, 2 mamyr kúni SQO-nyń Jeliakovo aýylynda qýraǵan shópke ot qoiǵanda, órt aýylǵa kirip, 6 úi janyp ketken edi. Óńir basshysy Qumar Aqsaqalov órtten zardap shekkenderge kómek kórsetiletinin aitty.
