Soltústik Qazaqstan oblysynda jyl basynan 1293 sheteldik azamat óńirde eńbek etýge ruqsat aldy, dep habarlaidy "Ult aqparat".
SQO politsiia departamenti baspasóz qyzmetiniń málimetinshe, bir ai buryn óńirde eńbek migranttaryna ruqsat berýdiń jańa formaty engizildi. Endi oblys aýmaǵynda jumys isteýge ruqsat alý úshin nemese merzimin uzartý úshin migratsiialyq qyzmettiń bólimderine barýdyń qajeti joq. 14 qyrkúiekten bastap bul memlekettik qyzmetti barlyq qalalyq jáne aýdandyq halyqqa qyzmet kórsetý ortalyqtary kórsete bastady.
«Indetke bailanysty jumysty jańasha qurýǵa májbúr boldyq. Bir aidyń ishinde halyqqa qyzmet kórsetý ortalyqtary arqyly 95 patent berildi.
Jalpy jyl basynan 1293 sheteldik azamat óńir aýmaǵynda jumys isteýge ruqsat aldy. HQO-ǵa belgili formada toltyrylǵan ótinish-saýalnamany, jeke tabys salyǵyn aldyn ala tólegen túbirtek kóshirmesi, memlekettik shekarany ótti degen belgisi bar jeke kýáliginiń kóshirmesi, aýyrmaityndyǵy jóninde meditsinalyq anyqtama, daktiloskopiiadan ótkendigi týraly anyqtama, foto sýret pen meditsinalyq saqtandyrýdyń kóshirmesin tapsyrý qajet», -deidi SQO PD migratsiia qyzmeti basqarmasynyń bastyǵy Talǵat Ábilev.
Mamandardyń aitýynsha, SQO-da eńbek etýge ruqsatty eń kóp alǵan Ózbekstan azamattary – 574 adam, Tájikstannyń 378 jáne Ázerbaijannyń 332 azamaty alǵan. Sheteldikter kóbine úi jumystaryna – bala kútýshi, baǵban jáne qara jumysshy bolyp ornalasady jáne qurylys jumystaryna tartylýda.
Al SQO aýmaǵynda zańsyz jumys istegeni úshin jyl basynan 65 sheteldik ákimshilik jaýapkershilikke tartyldy. Eńbek migranttaryn zańdy buza otyryp jumysqa tartqany úshin Qazaqstannyń 21 azamaty jaýap berdi.
