Soltústik Qazaqstan oblysynyń bilim berý mekemelerinde Uly Abaidyń 175 jyldyǵyna arnalǵan mereitoilyq is-sharalar bastaý aldy, dep habarlaidy "Ult aqparat".
Abai Qunanbaevtyń mereitoiyna arnalǵan saltanatty is-sharalar oblystyń barlyq bilim ordasynda keń kólemde uiymdastyrylmaq. SQO bilim basqarmasy arnaiy jospar quryp, bekitti. Búgin Petropavl qalasyndaǵy oqýshylar saraiynda ótken «Hákim Abai danalyǵy» atty kesh sonyń bastaýy boldy.
«Oblystaǵy barlyq mektepterde Abai ortalyqtaryn ashý josparlanǵan. Ol jerde Abaitaný pánderi qosymsha sabaq retinde ótetin bolady. Jalpy josparymyz aýqymdy. Túrli viktorinalar, tárbie saǵattary, konkýrstar josparlanǵan. Ustazdar arasynda halyqaralyq forým uiymdastyramyz, sondai-aq muǵalimderdiń ǵylymi zertteýleri boiynsha kitap shyǵaramyz», - deidi oblystyq bilim basqarmasynyń jetekshisi Gúlmira Kárimova.
Keshte Abaidyń óleńderi oqylyp, ánderi aityldy. Kórermenniń nazaryna teatrlandyrylǵan kórinis usynyldy. Óńirdiń ziialy qaýym ókilderi jastar ónege alar oilarymen bólisti.
«Abaidyń boiyndaǵy, onyń naqyl sózderindegi bar jaqsy qasiet ár qazaqtyń boiynan tabylsa eken deimiz. Abai osydan 1,5 ǵasyr buryn ómir súrse de, sol kezdegi qazaqtyń minez-qulqyndaǵy, salt-sanasyndaǵy jaǵdailar áli ózgergen joq», - deidi keshtiń qurmetti qonaǵy, Qazaqstannyń eńbek sińirgen qairatkeri, professor Zarqyn Taishybai.
Jaqynda Uly aqynnyń mereitoiyna orai Petropavldaǵy 19 yqsham aýdanda ornalasqan qazaq mektep-gimnaziiasyna Abai esimi berilmek. Oblystyq bilim basqarmasynyń baspasóz hatshysy Jansaia Qaiypovanyń aitýynsha, qazirgi ýaqytta qajetti qujattar ázirlenip jatyr. Budan basqa M.Qozybaev atyndaǵy Soltústik Qazaqstan memlekettik ýniversiteti janyndaǵy til jáne ádebiet institýtyna da qazaqtyń birtýar aqynynyń esimi beriledi dep josparlanǵan.
