Soltústik Qazaqstan oblysynyń Aiyrtaý aýdanynda sýblimatsiialanǵan qurǵaq bie sútin óndiretin jańa kásiporyn jumysyn bastady. Joba «Sever Agro LTD» JShS-men agroónerkásiptik keshendi nesieleý baǵdarlamasy aiasynda memlekettik qoldaý arqyly júzege asyryldy. Investitsiia kólemi 3 mlrd. teńgeden asty.
Kásiporyn kompaniianyń óz fermasy bazasynda salynǵan. Óndiristik keshen quramyna bie ustaýǵa jáne saýýǵa arnalǵan alańdar, 20 myń gektardan asatyn jaiylymdyq jerler, sondai-aq sýblimatsiialyq keptirý jelilerimen jabdyqtalǵan tseh kiredi. Kásiporynda 30 jańa jumys orny ashyldy.
Óndiris tehnologiiasy nemis sharýasy ári kásipkeri Gans Tsolman ázirlegen tereń sýblimatsiia ádisine negizdelgen. Onyń sharýashylyǵy 1970 jyldardan beri jylqy ósirýmen ainalysady, al 1990 jyly bie sútin osy ádispen óńdegen alǵashqy ónerkásiptik tájiribe júrgizilgen. Miýlben qalasyndaǵy Tsolman fermasy Germaniiadaǵy qymyz óndirýge mamandanǵan eń iri jáne eń kóne kásiporyndardyń biri bolyp sanalady. Sarapshy jabdyqty ornatý, iske qosý jáne qazaqstandyq mamandardy oqytý jumystaryn ózi baqylaǵan.
Saýmaldy –55 °C temperatýrada muzdatyp, keiin ylǵaldy suiyq kúige ótpesten bólý protsesi ónimniń tabiǵi quramyn — albýmindi aqýyzdar, immýnoglobýlinder, dárýmender, fermentter men poliqanyqpaǵan mai qyshqyldaryn — barynsha saqtaýǵa múmkindik beredi. Osy ádis arqyly ónimniń saqtaý merzimi eki jylǵa deiin uzartylady.
Zaýyttyń jyldyq óndiristik qýaty 40 tonnaǵa deiin jetedi. Saýmal birneshe formatta shyǵarylady: untaq, jeke salynǵan sashe jáne kapsýla túrinde — saqtaý men paidalanýǵa qolaily nusqalar.
«Sever Agro LTD» direktory Erbýlat Kalenov jańa kásiporyn óńirdegi aýyl sharýashylyǵy shikizatyn tereń óńdeý áleýetin keńeitetinin atap ótti:
«Sýblimatsiialanǵan bie súti — mamandandyrylǵan tamaqtaný salasynan bastap, azyq-túlik óndirisiniń jekelegen baǵyttaryna deiin keń qoldanylatyn ónim. Biz ishki naryqty qamtamasyz etýmen qatar, Qytai men Eýropa elderine eksportty da josparlap otyrmyz. Zaýyttyń iske qosylýy óńdelgen ónim túrlerin kóbeitip, óńirdiń agroónerkásiptik sektordaǵy múmkindikterin nyǵaitady», — dedi ol.
Aita keteiik, 2023 jyly qyrkúiek aiynda Qostanai oblysynda jylyna 40 tonnaǵa deiin ónim óndiretin «Local Food» brendimen bie sútin keptirý fermasy iske qosylǵan bolatyn.
