Foto: © Sputnik / Abzal Kaliev
Soltústik Qazaqstan oblysynda sheneýnikter 4,3 milliard teńge biýdjet qarajatyn negizsiz jumsamaq bolǵan, - dep habarlaidy "Ult aqparat" óńir prokýratýrasyna silteme jasap.
Soltústik Qazaqstan oblysynyń prokýrorlary biýdjettik qarajatty jumsaý salasyna taldaý júrgizý barysynda memlekettik satyp alý týraly zańnamany júieli buzýdy anyqtaǵan.
Qalalyq qurylys bóliminiń laýazymdy tulǵalary «Memlekettik satyp alý jáne sáýlet, qala qurylysy salasy týraly» QR Zańdaryndaǵy talaptardy buza otyra, somasy 2,5 mlrd teńgege kóppáterli turǵyn úidiń qurylysy boiynsha memlekettik satyp alýlardy jer ýchaskesine quqyqty anyqtaityn qujattarsyz júrgizgen.
Basqa jaǵdaida, oblys ákimdiginiń laýazymdy tulǵalary QR Biýdjettik kodeksiniń talaptaryna qaramastan, eshqandai negizsiz ǵimarat satyp alý úshin 1,1 mlrd. teńge kóleminde biýdjet qarajatyn bólgen.
«Memlekettik satyp alýlar týraly» Qazaqstan Respýblikasynyń zańynyń talaptaryn buza otyra, osy biýdjet qarajatyna áleýetti jetkizýshiler úshin negizsiz shekteýlermen ashyq konkýrs arqyly satyp alýdy júrgizgen.
"Qadaǵalaý organynyń aktileri boiynsha joǵaryda atalǵan satyp alýlar buzyldy, jergilikti atqarýshy organdardyń kináli laýazymdy tulǵalary ákimshilik jáne tártiptik jaýapkershilikke tartyldy.
Atalǵan salada jyl basynan beri qadaǵalaý organynyń aktileri boiynsha jergilikti atqarýshy organdardyń 59 laýazymdy tulǵasy ártúrli jaýapkershilikke tartyldy, 19 memlekettik satyp alý buzyldy, nátijesinde 4,3 mlrd teńge biýdjet qarjysyn negizsiz jumsaýǵa jol berilmedi.
Biýdjettik qarajatty jumsaý suraǵy qadaǵalaý organynyń baqylaýynda" - delingen habarlamada.
