Soltústik Qazaqstan oblysy Ýálihanov aýdanyndaǵy «Kishkenekól» shekara bóliminiń bastyǵy Aidyn Tursynǵazyuly sýǵa ketken 2 jasar sábidiń tiri qalýyna sebepshi boldy, dep habarlaidy "Ult aqparat".
Shekara qyzmetiniń SQO boiynsha departamenti baspasóz qyzmetiniń málimetinshe, oqys oqiǵa 18 shilde kúni saǵat 17.30 shamasynda Ýálihanov aýdanynyń Qaraterek aýylynda bolǵan.
Aýlada oinap júrgen 2 jasar sábi bir mezet ata-ana baqylaýynsyz qalyp, sý toly ydysqa qulap ketken.
Balanyń sýda qansha bolǵany belgisiz, ony tapqan kezde sábide tirshilik belgisi bolmaǵan eken.
Sol kúni «Kishkenekól» shekara bóliminiń bastyǵy Aidyn Tursynǵazy jumyspen Qaraterek aýylyna kelgen eken. Ol oqys oqiǵanyń ústinen túsken.
«Maǵan shekarany ótý boiynsha halyqpen túsindirý jumysyn júrgizý mindeti qoiyldy. Aýyl turǵynarymen, fermerlermen sóilestim, sosyn aýyl ákiminiń úiine bardym. Jeksenbi bolatyn. Ákimniń úiine týǵan inisi otbasymen, sonyń ishinde 2 jasar sábiimen Nur-Sultan qalasynan qonaqqa kelgen eken. Sóilesip turǵanda balasyn izdegen ananyń daýsy shyqty. Ári-beri júgirip tappady. Biz de izdeýge qosyldyq. Bir kezde úi iesi - ákim sý toly ydystan sábidi taýyp, kóterip alyp shyqty. Bala kógerip ketken, qansha ýaqyt sýda bolǵany belgisiz, tirshilik belgisi bolmady», - deidi Aidyn Tursynǵazy.
Shekarashy boiyn birden jinap alyp, sábige alǵashqy meditsinalyq kómek kórsetedi.
«Jasandy jolmen demaldyrýǵa kiristim. Júrek tusyn ýqaladym. Balanyń ómiri úshin 15 minýt alysqan shyǵarmyn. Sharshap, eki-úsh ret toqtap, anasy jylap, toqtamańyz, kómektesińiz dep, bir mezet balanyń yńyrsyǵan daýsy shyqty-aý áiteýir.
Feldsherdi shaqyryp, ol dári egip, birden aýdandyq aýrýhanaǵa áketti. Odan jedel járdemmen oblys ortalyǵyna jetkizildi. Bala aman-esen. Qazir jaǵdaiy jaqsy, aptanyń sońyna qarai aýrýhanadan shyǵady dep estidim.
Aqyl-esi saý, túzý, sonshama ýaqyt myiyna ottegi barmaǵandyqtan múgedek bolyp qalar ma eken dep qorqyp edim. Áiteýir aman qaldy», - deidi Aidyn Tursynǵazy.
Qazirgi ýaqytta sábi Nur-Sultan qalasynda em qabyldap jatyr. Jaǵdaiy jaqsy.
